Avropa İttifaqı (Aİ) Şurasının Siyasi və Təhlükəsizlik Komitəsinin üzvləri Ermənistana səfər edəcək. Bildirilib ki, səfərin məqsədi regionda baş verən proseslər və Ermənistan-Azərbaycan sülh prosesi haqqında təsəvvür əldə etməkdir.

Səfərin sülh müqaviləsinə ciddi təsiri olacaq? Ümumiyyətlə, Aİ-nin Cənubi Qafqazda nə kimi missiyası ola bilər?

Cənubi Qafqaz regionu üzrə siyasi analitik, Arnold Stepanyan Ednews-a özəl açıqlamasında söyləyib ki, bu artıq dünyada artan praqmatizm anlayışının göstəricisidir:

“Avropa rəsmilərinin müxtəlif formatlarda bütün səfərləri Ermənistanın suverenliyini dəstəkləməklə Cənubi Qafqaz regionunda vəziyyəti sabitləşdirmək üçün israrlı cəhd kimi qiymətləndirilə bilər. Böyük regional oyunçuların Cənubi Qafqazda öz təsirlərini gücləndirmək cəhdləri ilə bağlı region ölkələrinin sabitliyi Avropa üçün prioritet vəzifədir. Düşünürəm ki, yaxın gələcəkdə dünya dövlətlərinin siyasi maraqları praqmatizm (praktikaya əsaslanan fəlsəfi görüş) anlayışına əsaslanacaq. Dəyərlər arxa plana keçəcək. İndi Qərb ölkələri üçün şimaldan neft məhsullarının tədarükünə və digər malların Qərb ölkələri ilə idxal-ixracına alternativ marşrut təmin etmək vacibdir. Regionumuzun coğrafiyası bizə bu istiqamətdə maraq mərkəzində olmağa imkan verir. Bu marağı təmin etmək üçün əsas şərt, Qafqazda münaqişə potensialının aradan qaldırılması, sabitliyin yaradılması, Rusiyanın təsirinin azaldılması və eyni zamanda Qara dəniz-İran boşluğunda tranziti təmin edən ən azı iki dövlətin Kollektiv Qərbə inteqrasiyasının zamanıdır”.

Əkbər Novruz