İsrail və İran arasında gərginlik müvəqqəti səngisə də, Tel-Əviv höküməti İrana qarşı cavab atəşini verəcəyini bildirib. Hazırda bunun baş verəcəyi tarix isə hələlik bilinmir. Artıq bir sıra spekulyasiyalar regional müharibənin baş verəcəyini və bunun III Dünya Müharibəsinə çevriləcəyini söyləyir. Regionda isə gözlər digər bir regional qüvvəyə - Türkiyəyə çevrilib. 

Türkiyənin Azərbaycandakı səfirliyinin keçmiş hərbi attaşesi, hərbi ekspert Yücel Karauz məsələni geniş şəkildə Ednews-a şərh edib. O, öz analizində mövcud gərginlikdə, 4 noyabr ABŞ-dakı prezident seçkilərinə qədər ciddi dəyişiklik olmayacağını söyləyib:

“13 aprel tarixi mühüm bir tarixdir. Ona görə ki, İran bu tarixdə ilk dəfə öz torpaqlarında birbaşa olaraq İsraili hədəf aldı. Bundan əvvəl Livan, Suriya və Yəmən torpaqlarından maliyyələşdirdiyi qüvvələr vasitəsilə öz fəaliyyətlərini icra edirdisə, indi özü birbaşa səfirliyə edilən hücumu BMT-nin 51-ci maddəsini əsas gətirərək həyata keçirtdi. Təbii ki, bu İranın imkanlarını göstərə bilməsi nöqteyi nəzərdən önəmli idi, lakin hərbi nəticə olaraq böyük bir təxribat yaratmadı. İsrail ABŞ ilə koordinasiyalı olaraq fəaliyyətlərini davam etdirirlər və İsrailin cavabı Ştatlarda keçiriləcək noyabr prezident seçkilərinə qədər birbaşa İranı hədəf alacaq bir şəkildə deyil, Suriya, Livan, İraq, Yəməndəki Tehranın dəstəklədiyi qüvvələrə qarşı ediləcək. Bu səbəbdən regional bir müharibə, böhran məsələsi gündəmdə qalmağa davam edəcək, lakin 4 noyabr seçkilərinə qədər çox böyük bir dəyişiklik olacağını düşünmürəm. 

Türkiyə isə hazırda İran və İsrail arasında baş tutan gərginliyə bir vasitəçilik edə bilməz. Çünki Türkiyənin İsrail ilə əlaqələri hazırda kəsilib. Hərçəndə Ankara rəhbərliyi, XİN rəhbəri Hakan Fidan başda olmaqla, İrana regionda gərginliyin daha da artmamasını və buradakı fəaliyyətini dayandırmasını söyləyib. Buna görə də Türkiyənin mediatorluğu İranı inandırmaq cəhdləri ilə davam edər. ABŞ, İngiltərə, İordaniya və Qərbdəki bir sıra dövlətlər isə İsraili məsələ ilə bağlı daha təmkinli yanaşmasına ikna edə bilər”.

Əkbər Novruz