Baqrat Qalstanyan erməni jurnalistlərlə söhbətində deyib ki, biz buna 6 il dözdük - bir neçə gün də bu əzaba, fəlakətə, dağıntıya dözün. O, Paşinynanı devricəyinə əminliyini ifadə edib:
“Heç nə dəyişməyib, onlar (hakimiyyət – red.) sadəcə narahatdırlar. Onlar kiminsə “qulağını” axtarırlar, çünki özləri hakimiyyətə belə gəliblər".
Belə iddialı açıqlamalardan sonra Ermənistanda hakimiyyət dəyişə bilər?
Mövzu ilə bağlı erməni siyasi fəal İşxan Verdiyan Ednews-a proqnozlarını paylaşıb. Onun zənnincə Ermənistanda hakimiyyətin dəyişməsi mümkünsüzdür.
“Müxalifət Paşinyana qarşı heç bir konstruktiv gündəm təklif etmir, hökumətin inkişaf planlarını həyata keçirməməsi üçün əlindən gələni edir və insanlar da bunu görür. İnsanlar görürlər ki, Baqrat və dostları Ermənistanı yenidən münaqişə zonasına sürükləməyə çalışır və bu, insanların xoşuna gəlmir. İnsanlar müxalifəti dəstəkləmir, buna görə də Baqrat ictimaiyyətin rəğbətini qazana bilməyib və bundan sonra da edə bilməyəcək. Cəmiyyət onu dəstəkləmir, açıq şəkildə onun üstündən keçir və belə bir şəraitdə mümkün hakimiyyət dəyişikliyindən danışmaq sadəcə mümkün deyil. Müxalifətin Nikol Paşinyanı hakimiyyətdən uzaqlaşdırmaq şansı sıfırdır, bu, etirazın ilk günlərindən göz qabağında idi və hər gün bu inam daha da güclənir. Adicə etiraz aksiyalarında iştirak edən insanların sayı da mediada göstərildiyi kimi çox deyil. Nikol Paşinyan möhkəm şəkildə ayaqları üzərindədir və heç nə onun hakimiyyətinə təhlükə yaratmır”.
Əkbər Novruz
