Aprelin 4-də Qazaxıstanın Aktau şəhərinin Türk dünyasının mədəniyyət paytaxtı elan edilməsinə həsr olunmuş genişmiqyaslı mədəniyyət festivalı başlayacaq.
“EDnews” xəbər verir ki , əsas tədbirlərdən biri ərazisində zəngin mədəni proqramın nümayiş olunacağı “Darxan Dala” etnoşəhərciyidir. Burada türk xalqlarının milli adət-ənənələri, ayinləri və ortaq tarixi-mədəni irsi təqdim olunacaq.
Aprelin 4-dən 6-dək etnoşəhərciyin səhnəsində türk dövlətlərinin incəsənət ustalarının iştirakı ilə konsert proqramları keçiriləcək. Festivalın qonaqları xalq yaradıcılığı ab-havasında qədim adət-ənənələrlə tanış ola və qazax mədəniyyətinin zəngin irsini qiymətləndirə biləcəklər.
Etnoşəhərciyin ərazisində yeddi etnokənd yerləşir ki, onların hər biri müəyyən bir bölgənin kimliyini, tarixini və mədəni xüsusiyyətlərini əks etdirir. Hər bir etnokənddə qazax ayinlərinin, adət-ənənələrinin nümayişi, eləcə də xalq sənətkarlığı üzrə ustad dərsləri keçiriləcək.
Aprelin 5-də “Aktau – Türk dünyasının mədəniyyət paytaxtı” adlı bayram tədbirinin açılış mərasimi olacaq, Burada türk dövlətlərinin nümayəndə heyətlərinin çıxışları və regionun ən yaxşı yaradıcılıq qruplarının iştirakı ilə bayram konserti təşkil ediləcək.
Festival aprelin 6-dək davam edəcək və Qazaxıstanın tanınmış sənətçilərinin iştirakı ilə mədəniyyət və birlik bayramının parlaq finalına çevriləcək böyük qala-konsertlə başa çatacaq.
Xatırladaq ki, Aktau 2024-cü ilin noyabrında Türkmənistanın Anau şəhərindən estafeti qəbul edərək 2025-ci ildə Türk dünyasının mədəniyyət paytaxtı statusunu alıb.
Fatimə Mərdanlı // EDnews
