Xəbər verdiyimiz kimi, Biləsuvar rayonu İ.İsmayılıov adına Ovçubərə kənd tam orta məktəbində direktorla müəllim arasında münaqişə yaşanıb. Bu barədə görüntülər sosial şəbəkədə yayılıb. Məktəbin direktoru Üzeyr Eyvazov və riyaziyyat müəllimi R.Əmirov arasında hadisə yaşanıb.

 

Bu məsələ ilə bağlı təhsil eksperti Kamran Əsədov Ednews-a açıqlmasında bildirib ki, son 2 ildə məktəblərdə neqativ halların baş vermə sayı 2 dəfə artıb. Onun sözlərinə görə, hazırda ölkəmizdə 4 432 orta ümumi təhsil məktəbi var. Bu məktəblərdə isə 1,6 milyon şagird təhsil alır.

 

“Çox təəssüflər olsun ki, son 2 ildə məktəblərdə neqativ halların baş vermə sayı 2 dəfə artıb. Konkret olaraq, faktlar üzrə təhlil aparsaq görərik ki, bir neçə əsas səbəb var. Məsələn, bir-neçə gün bundan əvvəl 49 nömrəli məktəb-liseydə və yaxud digər məktəblərdə şagirdlərdən pul yığılması hallarına rast gəlinib. Digər xoşagəlməz halları da görürük. Son 2 ildə məktəblərdə baş verən hadisələrin təhlilini edəndə görə bilərik ki, əvvəlki 5 illə müqayisədə neqativ hallar daha çoxdur”.

 

K.Əsədəov məluma hadisəyə də münasibət bildirdi. O, qeyd etdi ki, məktəbdən olan görüntülər adi hala çevrilibmiş kimi gəlir. Belə faktlar bir mənalı şəkildə yayılmalıdır. 

 

“Ona görə ki, bu videolar hansısa problemlərin həllərini tapmaqda köməklik edir. Bu halın baş verməsinə səbəb isə təyinatların keyfiyyətli olmamasıdır. Direktorların işə qəbulu effektiv deyil. Baş verən hadisə məktəbdə təhsil mühitinin olmadığını göstərir. Regional təhsil idarə məktəblərə nəzarət etmir. Dünən görüntüləri yayılan məktəbdə kiçik araşdırma apardıq. Gördük ki, qanunsuzluqlar var. Direktor özü ilə bərabər iki işçi gətirib. Həmin bu iki işçi 50 kilometr aralıqda fərqli məktəbdə də işləyirlər. Hesab edirəm ki, belə halların olmaması üçün nazirlik tərəfindən monitorinqlər aparılmalıdır. Hazırda, təhsil sistemi ölüb. Sağlam mühit, hesabatlıq, daxil olan şikayətlərin araşdırılması kimi şeylər məktəblərdə yoxdur. Məktəblərdə yalnız maddi maraqlar naminə təyinatlar verilir. İndiki təhsil mühitinin vəziyyəti 1990-cı illəin əvvəllərindəki qədər qarışıqdır”- deyə ekspert vurğulayıb. 

 

Aysel Şahmar 

 

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary