Xəbər verdiyimiz kimi, ölkə üzrə Dövlət İmtahan Mərkəzi tərəfindən tam (11 illik) orta təhsil səviyyəsi üzrə buraxılış imtahanları keçirilib. Ümumi (9 illik) orta təhsil səviyyəsi üzrə buraxılış imtahanı isə 9, 16 və 30 aprel tarixlərində keçirilməsi planaşdırılır. 

11 illik buraxılış imtahanından sonra şagirdlərin imtahanın çətinlik səviyyəsi ilə bağlı olan etirazları sosial mediada gündəmə çevrilib. Bu səbəbdən, 9-cu sinif şagirdləri verəcəkləri buraxılış imtahanı ilə bağlı narahatdırlar. 

Mövzu ilə bağlı təhsil eksperti Kamran Əsədov Ednews-a verdiyi açıqlamada bildirdi ki, 11-ci sinif buraxılış imtahanı ilə 9-cu sinif buraxılış imtahanını eyniləşdirmək nə dərəcə doğrudur? Narahatlığa səbəb varmı? İlk növbədə qeyd edim ki, bu il 9-cu sinif üzrə 135.000 şagirdin buraxılış imtahanı verəcəyi gözlənilir.

"Bu kifayət qədər böyük bir rəqəmdir. Aprel ayında keçiriləcək buraxılış imtahanın məğzi 9-cu siniflərdə narahatlıq doğurduğu doğrudur. İmtahanların məzmunu və strukturu baxımından 9-cu sinifin imtahanıyla, 11-ci sinifin imtahanları bir-birindən tamamilə fərqlidir. 9-cu sinif imtahanı daha asan tipli hesab olunur. Düşünürəm ki, 11-ci siniflərin buraxılış imtahanlarında gördüyümüz sualların 9-cu siniflər üçün təkrarlanma ehtimalı yoxdur. Çünki imtahanın əhəmiyyəti baxımından 9-cu sinif buraxılış imtahanı ilə 11-ci sinif imtahanını eyniləşdirmək düzgün deyil. Bildirim ki , 11-ci sinif  buraxlış imtahanı həm də Qəbul imtahanın birinci mərhələsi hesab olunur. Bu səbəbdən məzmun və struktur fərqlilikləri var." 

Ekspert əlavə edib ki, aprel ayında 9-cu siniflər üçün keçiriləcək imtahanlarda daha çox asan və orta tipli suallardan istifadə olunacaq. Çünki  9-cu sinif şagirdləri ilə 11-ci sinif şagirdlərinin imtahana hazırlıq səviyyələri eyni deyil. Bu il 9-cu sinif imtahanı verəcək şagirlərimiz 7 və 8-ci siniflərdə onlayn rejimdə təhsil alıblar. Bu səbəbdən tədris proqramın tam mənimsənilməsində 9-cu siniflərin problemləri mövcuddur. Nəticə etibarı ilə düşünürəm ki, 9-cu sinif və 11-ci sinif  şagirdlərinin imtahanlarının çətinlik səviyyələrini eyniləşdirmək düzgün deyil.”

Qeyd edək ki, Nazirlər kabinetinin 18 may 2020-ci il tarixli qərarı və 2021-ci ildəki dəyişikliklər ilə 9-cu sinif Buraxılış imtahanı 1 mərhələdə keçirilir. İmtahanda şagirlərin bilikləri 3 müxtəlif fənn (Azərbaycan dili , Riyaziyyat və Xarici dil ) üzrə 100 ballıq şkala ilə qiymətləndirilir . Ümumilikdə 30 Azərbaycan dili, 30 riyaziyyat və 25 Xarici dil üzrə suallar olmaqla, 85 test tapşırığı şagirlərə təqdim olunur.

Mətanət Abbas

• Tag:
• təhsil
• imtahan
• buraxılış imtahanı