Bildiyimiz  kimi son zamanlarda süni intellekt olduqca geniş formada inkişaf edib. Artıq bir çox qlobal şirkətlərdə bu müasir texnologiya tətbiq edilir. Süni intellekt yaxın gələcəkdə hansı iş yerlərində insanları əvəz edəcək? 

“Fikrimcə, bütün sahələrdə süni intellekt insanları əvəz edə biləcək”. 

Bunu Ednews-a açıqlaması zamanı İnformasiya və Kommunikasiya Texnologiyaları eksperti Elvin Abbasov deyib.

“Süni intellekt dünya həcmində insanların işləmə prinsiplərinə görə inkişaf edir. Bu texnologiya hər sahədə ola bilər, amma hər işi görə bilməz. Hazırda dünyada bir çox təşkilatlar və dövlətlər süni intellektdən istifadə etmək üçün bu texnologiyaya külli miqdarda investisiya yatırırlar. Beləcə, süni intellekt texnologiyaları və robotların şirkətlərdə insanların yerini alacağı gözlənilir. Demək olar ki, bu gün xidmət, istehsal və hərbi sahələrdə süni intellektdən istifadə edilir. Bunun baş verməsi sadəcə olaraq vaxt məsələsidir. Misal üçün Avropa dövlətlərində 2023-cü ildə müəllimləri süni intellektlə əvəz etmək müzakirə edilir. Sosial baxımdan insanlarla münasibət yarada bilən texnologiyaların müəllimlərdən daha efektiv olacağı gözlənilir. Başqa bir misal olaraq süni intellektin artq təcrübədən keçirildiyi bir peşədən danışmaq olar. Taksi xidmətində bu dəyişiklik hələ ki, ABŞ-da və Avropada müşahidə edilir. Ən böyük şəhərlərdə sürücüsüz taksilər fəaliyyət göstərir və bu barədə hələ ki, ciddi narazılığa rast gəlinməyib”.

Ekspert süni intellektin insanları işsiz qoymayacağını, əksinə insanlar üçün yeni iş sahələrinin yaranacağını bildirib.

“Məhsuldarlıq haqqında onu da qeyd etmək lazımdır ki, süni intellekt insandan dəfələrlə daha məhsuldar və effektivdir. Kompüterlərin dəqiqliyi insanlarda hər zaman narahatlıq yaradıb. Təbii olaraq, onlar öz işlərini itirməkdən narahatdırlar. Lakin, bu sahə üzrə mütəxəssis olan hər kəsin də dediyi kimi süni intellektin işsizliyi artırması əsassız yaranan bir illuziyadır. İnsanların süni intellektdən qorxması mənasıdır. Mühasibatlıq, energetika və digər istehsalat sahələrində kompüterlərin insanların işini əvəz etməsi bizləri işsiz qoymayacaq, bizim fuksiyalarımı dəyişəcək”.

Azərbaycanın süni intellekt sahəsindən geri qaldığını deyəb mütəxəssis, bildirib ki, istəsək də, istəməsək də bu texnologiyanın yayılmasının qarşısını almaq mümkün deyil.

“Azərbaycanda süni intellekt sahəsində demək olar ki, heç bir iş görülmür. Nə dövlət, nə də özəl sektorlar süni intellektin potensialından lazımınca istifadə etmir. Bununla belə, gələcəkdə ölkədə süni intellektin yayılması qaçılmazdır. Ümumiyyətlə, bu, ən zəif inkişaf etmiş ölkələrə də aiddir. Məsələ burasındadır ki, bu sahədə heç bir işlər görülməsə belə digər ölkələrin hesabına bəlli həcmdə inkişaf olacaq. Texnologiyaların bütün dünyada istifadə edilməsinin qarşısını almaq sadəcə olaraq mümkün deyil”.

Fərid Axund