Bir müddətdir ki, fərdi repetitorluq faəliyyətilə məşğul olan müəllimlər qiymətləri artırıblar. Abituriyentlərin sözlərinə görə, əvvəlki dövrlə müqayisədə bu xidmət 30 faiz bahalaşıb. Tədris ilinin ortasında bu cür qiymət artımı valideynlərin ciddi etirazına səbəb olub.

Məsələ ilə bağlı təhsil eksperti Elmin Nuri Ednews-a açıqlamasında bildirdi ki, repetitorların xidmət haqlarının qaldırılması ilə bağlı məsələlər media, TV və sosial şəbəkələrdə sürətlə yayılmaqdadır. Açığı bu, müəyyən qədər nisbi məsələdir. Məsələn, repetitorluq xidməti hər hansı ərzaq, meyvə-tərəvəz, un məmulatı deyil ki, qiyməti bir yerdə qalxdığı üçün digər yerlərdə də bu hiss olunsun:

“Repetitorluq hər hansı fərdin öz əqli mülkiyəti hesabına göstərdiyi xidmət sahəsidir. O burada kimdənsə asılı deyil. Hüquqi baxımdan istənilən qiyməti öz xidmət haqqı üçün təyin edə bilər. Amma burada iki amili unutmaq olmaz: mənəvi amil və marketinq etikası. Bunlar da hələ sonrakı mərhələyə aid məsələlərdi. İlkin mərhələdə biz ümumiyyətlə, repetitorluğun fəaliyyətini stimullaşdırmaq, onun təhsilə bundan sonra da vuracağı yaraları sağaltmaqdır. Bizdə bugün repetitorluq fəaliyyətinin stimullaşdırılmasına ciddi ehtiyac var. Onların işi fərdi sahibkar fəaliyyəti kimi qəbul edilməli və vergiyə cəlb olunmalıdırlar. Üstəlik, repetitorlar yalnız lisenziya aldıqdan sonra bu fəaliyyətlə məşğul olsalar, onların təyin etdikləri qiymətlər artıq öz qərarları ilə deyil, uyğun bazar qiymətləri ilə tənzimlənər. Bugün biz repetirorluq fəaliyyətinin özünü bir kənara qoyub, onların süni qiymət artırmalarını müzakirə edirik”. 

Ekspert düşünür ki, bu artıq problemin görünməyən qatıdır: 

“Bugün orta təhsil müəssisələri üçünm müəyyənləşdirilmiş qəbul proqramı, DİM-in qəbul imtahanı üçün hazırladığı proqramdan xeyli fərqlənir. Doğrudur, məzmun etibarilə onlar demək olar ki, eynidir. Məsələn, Ədəbiyyat fənni üzrə tədris proqramında hansı mövzular varsa, DİM-də onu qəbul imtahanı üçün proqrama daxil edir. Amma necə? Burada sualların qoyuluşu, məzmun vasitələri, səbəb-nəticə əlaqələri və digər mexanizmlər abituriyent üçün tamamilə yeni bir formatda hazırlanır. Təbii ki, belə olan surətdə aradakı bu uçurumu aradan qaldırmaq üçün repetitorlar dövriyyəyə girir. Onlar həmin proqramı uşaq üçün çatımlı hala çevirərək, onları imtahana hazırlayırlar. Artıq uzun illərdir ki, belə bir yazılmamış qanun var: lap ən hazırlıqlı və bilikli şagird ol, əgər repetitor yanına getməmisənsə, deməli heç nə edə bilməyəcəksən"... Bu, çox təəssüfləndirici məsələdir. Artıq repetitorluq məktəb amilini təəssüf ki, kölgəsində saxlayıb. Bunu aradan qaldırmağın yollarını tapsaq, qiymət artımı məsələsini də həll edə bilərik”.

Oğuz