“Meta»nın sahibi Mark Zukerberq həm istifadəçilər, həm də biznes üçün yeni “WhatsApp” funksiyalarını açıqlayıb.
Ednews Türkiyə mətbuatına istinadən xəbər verir ki, şirkət indi istifadəçilərə yeni süni intellekt xüsusiyyətləri təklif etmək üçün çalışır.
Zukerberq elan edib ki, yeni funksiya sayəsində müəssisələr süni intellekt dəstəyi ilə Instagram və Facebook reklamları yarada biləcəklər.
Zukerberq əlavə edib ki, “Meta Verified” nişanı Braziliya, Hindistan, İndoneziya və Kolumbiya kimi əsas bazarlarda WhatsApp Business proqramında mövcud olacaq.
Bu nişan biznesin etibarlılığını artıracaq, şəxsiyyət oğurluğundan qoruyacaq və qabaqcıl dəstək xidmətləri göstərəcək.
“WhatsApp” istifadəçiləri böyük bizneslərə birbaşa çat interfeysindən zəng edə biləcəklər. Bu funksiya mürəkkəb suallar üçün daha sürətli və fərdiləşdirilmiş yardım təmin edəcək.
“WhatsApp»ın ən son beta versiyasında təqdim edilən funksiya sayəsində istifadəçilər artıq söhbətlərdə süni intellektlə şəkillər yarada biləcəklər.
Xüsusiyyətin Meta-nın platformalarına gətirdiyi “Meta AI” adlı süni intellekt modelindən istifadə edəcəyi bildirilir.
Xatırladaq ki, Meta AI funksiyası hazırda Azərbaycanda mövcud deyil.
Mikayıl
