Çin rəsmiləri sosial media platforması “TikTok”un ABŞ əməliyyatlarına nəzarəti “SpaceX” və “Tesla” şirkətlərinin yaradıcısı, milyarder İlon Maska təhvil verməyi düşünür.
“EDnyus” xəbər verir ki, bu barədə Bloomberg agentliyinin mənbələri məlumat verib.
Onların fikrincə, Pekin üçün prioritet ssenari “TikTok”un ana şirkəti “ByteDance”ın mülkiyyətində qalmasıdır.
Bununla belə, sosial platformanın satışı üçün son tarix yaxınlaşdıqca, Çin rəsmiləri fəaliyyət planlarını müzakirə etməyə başlayıblar ki, bunlardan biri də şirkətin Amerika əməliyyatlarının Maska satılmasını nəzərdə tutur.
Çinin “ByteDance” şirkəti ya sosial şəbəkəni satmalı, ya da yanvarın 19-dək ABŞ-dakı fəaliyyətini dayandırmalıdır. Hazırkı prezident Cozef Bayden 2024-cü ildə Konqres tərəfindən qəbul edilən qanunu imzalayıb.
Dekabrın sonunda ABŞ-nin yeni seçilmiş prezidenti Donald Tramp hakimlərdən qanunun müddəalarını dayandırmağı xahiş edib.
