Bu gün 2016-cı il Şanlı Aprel döyüşlərində şəhid olan hərbçilərimiz Baş-leytenant Rəşid Mehdiyevin və Xüsusi Təyinatlı bölüyün giziri Elimdar Səfərovun doğum günüdür.
Eurasia Diary xəbər verir ki, şəhid zabitimiz Rəşid Mehdiyevin atası Rövşən Mehdiyev moderator.az-a açıqlamasında bildirdi ki, bu gün şəhidimizin doğum günüylə bağlı tədbir keçirilir:
“Bu gün Rəşidin 29 yaşı tamam olur. Hazırda kənd orta məktəbimizdə bu münasibətlə tədbir keçirilir. Sonra isə şəhidimizin məzarını ziyarət edəcəyik. Rəşid haqqında həmişə müsbət fikirdə olmuşam və bu gün də onu deyə bilərəm ki, evin tək oğlu idi. Hərbçi olmağı da özü istədi və mən də buna razılıq verdim. Hər il aprelin 1-də biz çox pis oluruq, çünki Rəşid həmin gün anasının doğum gününə gələcəkdi. Amma elə oldu ki, aprelin 5-də şəhid xəbəri gəldi. Bizim üçün ən böyük təsəlli şəhidlərimizlə bağlı keçirilən tədbirlərdir, bizlərə göstərilən diqqətdir. Hamınıza təşəkkür edirik”.
Xatırladaq ki, Rəşid Rövşən oğlu Mehdiyev 1990-cı il iyulun 26-da Salyan rayon Xələc kəndində anadan olub. O, Bakı Ali Ümumqoşun Komandirləri Məktəbini bitirib. Aprel döyüşləri zamanı qəhrəmancasına şəhid olan zabitimiz aprelin 5-də doğulduğu kənddə böyük izdihamla dəfn edilib. Ölümündən sonra ölkə başçısının sərəncamı ilə şəhid Rəşid Mehdiyev “İgidliyə görə” medalı ilə təltif edilib.
Şəhid gizirimiz Elimdar Səfərovun qardaşı Elizbar Səfərov bildirdi ki, şəhid qardaşının adını yaşatmaq üçün hər şey edir:
“Bu gün Elimdarın 27 yaşı tamam olur. Bu münasibətlə kəndimizdə yaradılan Şəhidlər parkında tədbir keçirilir. Özüm də hərbçiyəm və bu gün tək arzum qardaşımın adının yaşamasıdır. Ona görə də bu istiqamətdə əlimdən gələni əsirgəmirəm. Elimdar şəhid olandan sonra dünyaya gələn oğluma da onun adını qoydum. İndi oğlum qardaşım Elimdarın adını daşıyır. Hamıya göstərdikləri diqqətə görə təşəkkür edirik”.
Xatırladaq ki, Elimdar Səfərov 1992-ci il iyulun 26-da Yardımlı rayonunda anadan olub. Ailəsi sonradan Neftçala rayon Aşağı Qaramanlı kəndinə köçüb. Xüsusi Təyinatlıların giziri olan Elimdar aprel döyüşlərində qəhrəmancasına şəhid olub. Aprelin 4-də isə şəhidimiz doğulduğu kənddə böyük izdihamla dənf edilib. Ölkə başçısının sərəncamı ilə şəhid Elimdar Səfərov “Hərbi xidmətdə fərqlənməyə görə” üçüncü dərəcəli medalı ilə təltif edilib.
Allah cəmi şəhidlərimizə rəhmət eləsin!
