Jurnalistlərdən Atakişiyevin qayınatasına sərt tənqid - “Adam bu dar macalda yarınma planları qurub” | Eurasia Diary - ednews.net

17 Sentyabr, Çərşənbə axşamı


Jurnalistlərdən Atakişiyevin qayınatasına sərt tənqid - “Adam bu dar macalda yarınma planları qurub”

Cəmiyyət A- A A+

"Müxtəlif siyasi partiya üzvlərindən və siyasi qruplardan sabah keçiriləcək vida mərasiminə qatılmamağı xahiş edirik".

Xəbər verdiyimiz kimi, bu sözləri Xəzər dənizi üzərində təlim uçuşları zamanı qəzaya uğrayaraq həlak olan Azərbaycan Hərbi Hava Qüvvələrinə məxsus MiQ-29 qırıcı təyyarənin pilotu, polkovnik-leytenant Rəşad Atakişiyevin qayınatası, keçmiş dövlət müşaviri, politoloq Qabil Hüseynli deyib. O, R.Atakişiyevlə vida mərasimindən müxtəlif siyasi məqsədlər üçün istifadə etmək arzusunda olan şəxslərə müraciət ünvanlayıb:

"Ailəmiz çox çətin, ağır və kövrək bir dönəmdən keçir. Ailəmizin, hətta xalqımızın sevimlisi, rəşadətli pilotumuz Rəşad Atakişiyevi itirmişik. Mərhumun dəfni ilə bağlı həyata keçirilən vida mərasiminə dövlət öz dəstəyini göstərir. Müəyyən siyasi partiyaların və qrupların tədbirə qatılmaq və mərasim vasitəsilə siyasi divident əldə etmək istəkləri barədə məlumatlar əldə etmişik. Həmin şəxslərdən artıq dərəcədə xahiş edirik ki, sabah keçiriləcək vida mərasiminə qatılmasınlar. Rica edirəm ki, bu ağrılı günümüzdə bizi başa düşsünlər".

Qeyd edək ki, keçmiş dövlət müşavirinin bu açıqlaması ölkə ictimaiyyətində ciddi rezonans doğurub. Hüseyinlinin müraciətinin sonunda “başa düşsünlər” xahişi yer alsa da, bu müraciət nə xoş qarşılanıb, nə də başa düşülüb. Axı heç bir siyasi etikaya uyğun olmayan, xalqın birliyi və həmrəyliyinə zidd bu çağırış neçə xoş qarşılana bilərdi?!

Eurasia Diary xəbər verir ki, “Moderator.az” sayıtının baş redaktoru Zülfüqar Hüseynzadə pilotun anım mərasiminə qatılmayacağını bəyan edərək, Qabil Hüseylinin sözügedən müraciətini sərt tənqid edib:

“Qabil Hüseynlinin bu yöndəmsiz çağırışından sonra mən də şəhid pilotumuzun dəfn mərasiminə qatılmaqdan vaz keçdim. Heç yas mərasiminə də gedən deyiləm. Amma özüm 40 gün onun yasını saxlayacam. Məkanı Cənnət olsun!”.

“Yeniçağ.az” saytının baş redaktoru Aqil Ələsgər də Q.Hüseynlini tənqid edənlər arasındadır:

“Açığı, ağırdır bu barədə yazmaq. Şəhid pilot üçün hər kəs ağladı. Necə ki, aprel döyüşlərində verdiyimiz itkilər üçün sızlamışdıq. Bu cür zabitlər bir-iki ilə yetişmir. Nəzərə alsaq ki, orduda irili-xırdalı nəcməddinlər hökm sürür, buraya qədər yüksələn milli zabitləri itirdiyimiz üçün daha çox ağrıyır qəlbimiz. 
Qaynatasının istəyinə gəlincə, keşkə dəyərlərimizi də pilotumuzla birlikdə dəfn etməyəydi. Ölkədən gedərkən apara bilmədiyi hamilə gəlinini ən böyük düşməninə əmanət edəcək Kərbəlayi İsmayıllardan bu səviyyəyə düşmüşük. Cırlaşır, cılızlaşır, getdikcə özümüz özümüzə düşmən kəsilirik. Bu cəza bizə yetər...”.

Jurnalist Araz Zeynalov Q.Hüseylinin bu çağırışının öz iradəsinə əsaslanmadığını vurğulayıb:

“Pilotumuzun dəfn mərasimini milli həmrəyliik göstərisinə çevirmək əvəzinə, yenə də ayırıcılıq variantı seçildi... Əminəm ki, bu, şəhidimizin ailə üzvlərinin, özəlliklə də onun qaynatası, hörmətli Qabil Hüseynlinin qərarı deyil. Milləti parçalamaq mexanizmini düzənləyənlər hələ də iş başındadırlar...”.

Tanınmış jurnalist Sevinc Telmanqızı isə A.Zeynalovdan fərqli olaraq hesab edir ki, Q.Hüseynli bu çağırışı kimlərinsə istəyi ilə etməyib. Onun sözlərinə görə, iqtdiarın bu çağırışda heç bir rolu yoxdur:

“Məncə, onu heç kim bu açıqlamanı verməyə məcbur etməyib. Nəinki məcbur etməyib, heç təklif də olunmayıb. Adam bu dar macalda sadəcə çirkin oyunlar, yarınma planları qurub. Və... İqtidar bir çox məsələlərdə bu cür adamlardan daha ləyaqətli davranır. Təcrübə göstərib”.

Nicat İSMAYILOV

 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...