MiQ-29 gecə vaxtı quşla toqquşa bilərdimi? - hərbi ekspertdən AÇIQLAMA | Eurasia Diary - ednews.net

17 Sentyabr, Çərşənbə axşamı


MiQ-29 gecə vaxtı quşla toqquşa bilərdimi? - hərbi ekspertdən AÇIQLAMA

Cəmiyyət A- A A+

Xəbər verdiyimiz kimi, Müdafiə Nazirliyi iyulun 24-də gecə vaxtı təlim-məşq uçuşları həyata keçirən zaman qəzaya uğrayan Hərbi Hava Qüvvələrinin MiQ-29 tipli döyüş təyyarəsinin qəzaya uğramasının səbəblərini açıqlayıb.

Nazirlikdən bildirilib ki, uçuşun bort qeydiyyatçısındakı (“qara qutu”dakı) məlumatlar və uçuşun aparılması ilə bağlı digər texniki sənədlər mütəxəssislər tərəfindən təhlil edilərək öyrənilib və “Aviasiya hadisəsinin araşdırılması komissiyası”nın gəldiyi son rəyə görə təlim-məşq uçuşlarına cəlb edilən təyyarə qəzaya uğrama anına qədər döyüş qabiliyyətli və tam saz vəziyyətdə olub.

Hadisənin baş vermə səbəblərinin öyrənilməsi onu da göstərib ki, təyyarə Xəzər dənizinə düşməzdən əvvəl havada yad cisimlə (quş və ya quş dəstəsi) toqquşub və pilot xəsarət alıb. “Qara qutu”dan əldə edilən məlumatlara əsasən pilot qəzanın qarşısını almaq məqsədilə təyyarənin idarəolunmasını bərpa etməyə cəhd göstərib. Lakin pilotun aldığı ağır bədən xəsarəti bunu mümkünsüz edib və nəticədə aviasiya vasitəsinin qəzaya uğramasına gətirib çıxarıb.

Qeyd edək ki, Müdafiə Nazirliyinin pilot Rəşad Atakişiyevin idarə etdiyi qırıcı təyyarənin qəzaya uğramasına səbəb kimi MiQ-29-un quşlarla toqquşmasını bəyan etməsi birmənalı qarşılanmır. Sosial şəbəkə istifadəçiləri bu versiyanın mümkünsüzlüyü barədə fikirlər səsləndirməkdədirlər.

Məsələ ilə bağlı Eurasia Diary-ə açıqlama verən hərbi ekspert, polkovnik Şair Ramaldanov bildirib ki, Müdafiə Nazirliyi bu məlumatı özbaşına vermir. Onun sözlərinə görə, Müdafiə Nazirliyi tərəfindən mütəxəssislər cəlb edilərək komissiya yaradılıb:

““Qara qutu “aşkar olunana qədər Müdafiə Nazirliyi heç bir məlumat vermirdi. Çünki, “qara qutu” tapılıb məlumat alınana qədər komissiya heç bir fikir irəli sürmürdü. Hal-hazırda “qara qutu” tapılıb və oradan məlumatı oxuyublar və nəticədə də Müdafiə Nazirliyi tərəfindən rəsmi məlumat verilib. Bu hadisə haqqında insanların şübhlənib-şübhələnməməsi, bu, hər kəsin öz fikridir. Ancaq düşünürəm ki, şübhəyə alan ətraf hər halda mütəxəssis deyil, hər halda onların içərisində pilot yoxdur, hər halda onlar “qara qutu”nun oxunmasında iştirak etməyiblər”.

Şair Ramaldanov gecə saatlarında, həm də ilin bu vaxtında, köçəri quşların olmadığı bir vaxtda təyyarəmizin quşla toqquşmasının mümkün olub-olmaması barədə suala da aydınlıq gətirib.

“Quşların gecə və yaxud gündüz uçmasının fərqi yoxdur. Gecə də ola bilir, gündüz də. Yəni bu, qeyri-adi haldır. O qədər təyyarələr uçur, hamısı quşlara dəymir ki? Ancaq mən düşünürəm ki, Müdafiə Nazirliyinin yaratdığı komissiya maraqlıdır ki, onun nədən qəzaya uğraması səbəblərini öyrənib, sonra lazım olan qərarı qəbul etsinlər. Ona görə də Müdafiə Nazirliyi məlumatı düzgün verməmək, gizlətmək kimi bir məqsəd daşımır. Çünki, bunun nə məqsədi ola bilər ki? Təyyarədir, qəzaya uğrayıb, indiyə kimi komissiya işləyib və “qara qutu” da tapılıb. “Qara qutu”da da məlumat bu cür çıxıb və biz o komissiyanın işinə hörmətlə yanaşmalıyıq. Çünki, onlar mütəxəssisdir, kənar şəxslər deyil. Onlar “qara qutu”nu özləri oxuyublar və oradan çıxan məlumat onlardadır. Biz “quşlar gecə uçmur” deyirik, lakin biz şahidi oluruq ki, bəzən gecə də quşlar uçur, bunun şahidi olmuşuq. Bu, mütəxəssis rəyidir, onlar bu xəbəri cəmiyyətə verəndə, müəyyən əldə olan məlumata əsaslanırlar. Əgər belə olmasaydı onlar həmin günü verərdilər. Düşünürəm ki, komisiyanın rəyinə hörmətlə yanaşmaq lazımır”, - deyə polkovnik bildirib.

Leyla QƏNİYEVA

 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...