"Şagirdlərə ictimai nəqliyyatın pulsuz olması ilə bağlı təklifimizə Nazirlər Kabinetinin Mətbuat Xidmətindən pozitiv reaksiya gəldi. Artıq hörmətli baş nazirimizə bu məsələ ilə bağlı müraciət hazırlayıram, yaxın günlərdə göndərəcəyəm. Çox istərdim ki, vətəndaşlarımızı rahatsız edən bu məsələnin həllində lazımi həsaslıq göstəriləcəkdir."
Eurasia Diary xəbər verir ki, bunu deputat Fazil Mustafa bildirib.
Qeyd edək ki, bu gün Bakıda dövlətə məxsus olan "BakuBus" şirkətinin sərnişin daşıyan avtobuslarının birində sürücü bir ananın məktəbə apardığı 3 uşağına yol pulu verə bilmədiyi üçün onları avtobusdan düşürüb. Bu hadisə sosial şəbəkələrdə ciddi etirazlara səbəb olub. Deputat Fazil Mustafa isə hadisəni pisləməklə bərabər Nazirlər Kabinetinə çağırış edərək təklif edib ki, Bakı Nəqliyyat Agentliyi və Bakı Metropoliteni həftə içi məktəbli formasında olan uşaqlardan pul almasın.
Xatırladaq ki, Nazirlər Kabinetinin müvafiq qərarına əsasən Respublika ərazisində dövlətə məxsus nəqliyyat vasitələrində 5 yaşından yuxarı uşaqlara gediş haqqı tələb olunur.
Müşahidələrimizə görə, Bakıda özəl şirkətlərə məxsus marşrut avtobuslarının bəzisində 6 yaşdan yuxarı, bəzilərində isə 7 yaşından yuxarı sərnişinlər üçün yol pulu tələb olunur. Konstitusiya ilə sosial dövlət elan olunan və uşaq pulu ödənilməyən ölkədə dövlətə məxsus nəqliyyat vasitələrində yalnız 5 yaşa qədər uşaqlara güzəşt edilməsi anlaşılmazdır.