Birinci Vitse-Prezidenti Mehriban xanım Əliyeva şəhid ailələri, qazi və veteranlara qarşı həmişə diqqətlə yanaşaraq, onların problemlərinin həlli istiqamətində müsbət göstərişlər verir. Dünən şəhid Şaban Cəfərovun banka girov qoyulan mənzili də məhz birinci xanımın köməkliyi ilə şəhidin ailəsinə qaytarıldı.
Bu dəfəki müsahibimiz isə Cəlilabad rayon Muğan kənd sakini, ikinci qrup əlil Oqtay Dəmirovdur. O.Dəmirov da dörd övladıyla birlikdə indi M.Əliyevanın göstərişi ilə tikilən yeni mənzilinin sevincini yaşayır. Müsahibimiz deyir ki, Mehriban xanımla görüşmək isə bir qismət məsələsi olub:
“Mən Dəmirov Oqtay Xankişi oğlu 1983-cü ildə Cəlilabad rayon Muğan kəndində anadan olmuşam. Ailədə bir bacı və qardaşıq. Çox kasıbçılıqla böyümüşük. Ailəliyəm dörd övladım var. Atamı isə 2016-cı ildə itirmişəm. Neçə illər idi ki, atamgilin nimdaş, uçmaq təhlükəsiylə üz-üzə qalan komasında yaşayırdıq. Özüm ikinci qrup əliləm və neçə illərdir ki, müalicəylə yaşayıram”.
“Anam Mehriban xanımla görüşü zamanı çox çətin şəraitdə yaşadığımızı...”
“Anam isə bir neçə ildir ki, Üçüncü Fəxri Xiyabanda işləyir. İki ay öncə Mehriban xanım Əliyevanın fəxri xiyabana ziyarəti zamanı anam Razziyə Dəmirova onunla görüşməyə imkan tapıb. Anam Mehriban xanımla görüşü zamanı çox çətin şəraitdə yaşadığımızı, evimizin uçmaq təhlükəsiylə üz-üzə qaldığını bildirərək, xəstə övladımın əməliyyatı üçün Mehriban xanımdan kömək istəyib. Bu görüşdən bir neçə gün sonra rayon rəhbərliyi mənimlə əlaqə saxladı və Heydər Əliyev Fondu tərəfindən mənə yeni ev tikiləcəyi bildirildi”.
“Bununla yanaşı, məni mətbəx mebeliylə də təmin etdilər...”
“Mənə başqa yerdə ev tikmək üçün torpaq sahəsi təklif olunsa da, istəmədim. Dedim ki, elə ata evimizin yerində mənə ev tikilsin. Belə də oldu və Mehriban xanımın göstərişi nəticəsində mənə üç otaqlı, ümumi sahəsi 110 kvadratmetr olan ev tikildi. Bununla yanaşı, məni mətbəx mebeliylə də təmin etdilər və evdə son tamamlama işləri gedir”.
“On bir yaşlı qızım Xumar gözündəki problemlərə görə əməliyyat olundu...”
“Bununla yanaşı, özüm Bakıda xəstəxanalardan birində müayinə olundum, dərmanlarla təmin etdilər. On bir yaşlı qızım Xumar gözündəki problemlərə görə əməliyyat olundu. Bir sözlə, Mehriban xanım bizə yeni bir həyat bəxş etdi və mən öz ailəm adından ona dərin təşəkkürümü bildirirəm.
Bu gün kəndimizdə mənə ev tikilməsi hamı tərəfindən maraqla qarşılanıb. İnsanlar mənim kimi kasıb, çarəsiz bir insanı evlə təmin etdiyi üçün Mehriban xanıma dua edirlər. Allah Prezidentimizi, Mehriban xanımımızı qorusun. Bir neçə gün sonra ailəmlə birlikdə yeni mənzilimə köçəcəm”. (moderator.az)
