Bu gün tarixə 4 günlük müharibə kimi düşmüş, “Aprel döyüş”lərinin ildönümüdür. Əsgərlərimizin misilsiz qəhrəmanlıqları sayəsində Tərtər rayonunun Talış kəndi ətrafındakı yüksəkliklər və Seysulan kəndi, Cəbrayıl rayonunun Lələ təpə yüksəkliyi və Cocuq Mərcanlı, Goranboy rayonunun Gülüstan kəndi və Tərtər rayonunun Madaqiz kəndi istiqamətində yollar düşməndən azad olunub.

Aprel döyüşlərində Azərbaycan ordusu 92 şəhid verib. Raquf Orucov, Vüqar Yusifov, Samit İmanov, Əbu Bəkir İsmayılov, Pəncəli Teymurov və digər qəhrəman zabit və əsgərlərimiz canlarını bu vətən uğrunda qurban verib. Onlardan kimi öz döyüş yoldaşını xilas edərkən, kimisi isə torpaqlarımızın azadlığı uğrunda qəhrəmanca döyüşərkən, şəhid olub.

Aprel Döyüşlərinin taleyini ordumuzun xeyrinə dəyişən zabitlərimizdən bir qismi isə vətən yolunda qazi olub və bu gün onlar ordumuzun “canlı əfsanələri” hesab olunur. Bu məqalədə Aprel döyüşlərində xüsüsi igidliyinə görə fərqlənən bir neçə zabitimizi sizlərlə tanış edəcəyik.

 Mayor Mirdaməd Bağıyev

– O, zərgər dəqiqliyi ilə tabeçiliyində olan hərbi vasitələrdən istifadə edərək düşmənin tank alayının döyüş düzülüşünə açılmasının qarşısını almaqla döyüşün taleyini dəyişdi.

Ümumilikdə, o, erməni ordusunun 12 hərbi texnikasını (7ədəd tank, 1 ədəd PDM-2, 3ədəd şəxsi heyət dolu avtomobil və 1 ədəd yüksək rütbəli komandirlər üçün nəzərdə tutulan Jeep avtomobili) məhv edərək düşmənin bütün strateji planlarını alt-üst etdi.

Polkovnik-leytenant Nəsimi Şıxəliyev

– Orta əsrlərdə iki ordu üz-üzə gələndə Şixaliyev kimi cəngavər komandanlar döyüşün taleyini dəyişirdi. Onlar özləri ən öndə düşmənin üstünə şığımaqla arxasından minlərlə əsgəri aparır və döyüşdə zəfəri təmin edirdi. Nəsimi Şıxaliyev də “Aprel Döyüşləri”ndə orta əsr cəngavərlərindən heç də fərqlənməyərək tabeçiliyindəki 24 kəşfiyyatçı ilə birgə düşmən üstünə hücuma keçdi və Lələ Təpəni ələ keçirdi.

Polkovnik-leytenant Eldəniz Hüseynov

– O, Aprel döyüşlərində sözün həqiqi mənasında  Əliağa Şıxlıniskinin layiqli davamcısı olduğunu sübut etdi. Məlumdur ki, 4 günlük müharibədə artilleriyamız düşmənə göz açdırmır, qarşı tərəfə ağır itkilər verdirirdi. Döyüşlər zamanı Talış istiqamətində dəqiq artilleriya zərbələrilə düşmən üzərində qələbəmizdə müstəsna rol oynayan artilleriya rəisi Eldəniz Hüseynov ordumuz və xalqımız üçün fəxr yeridir, qürur mənbəyidir.

Polkovnik Ruslan Ağasiyev

- Aprel döyüşlərində hərbi hissə komandiri olmasına baxmayaraq tutduğu strateji yüksəkliyi səhərə kimi Gizir Çobanovla erməni xüsusi təyinatlıları ilə döyüşərək saxladı.

Qeyd edək ki, həmin yüksəklik hazırda onun sayəsində ordumuzun nəzarətindədir və polkovnikin adını daşıyır.

  Gizir Tahir Misirxanov

- Aprel döyüşlərində, Lələ təpə istiqamətində düşmənin 6 tankını vurmuşdu, Ali Baş Komandan tərəfindən “Azərbaycan bayrağı” ordeni ilə təltif edilən Gizir Tahir Misirxanov cəsarəti və dəqiqliyi ilə seçilən igidlərimizdən biri oldu.

İstər aprel döyüşləri, istərsə də düşmənlə digər toqquşmalarda həyatı bahasına vətən torpağını qoruyan igidlər bu xalqın qəhrəmanlarıdır. Onların adları dillər əzbəri olmaqla yanaşı, cəmiyyətdə yüksək nüfuz sahibləri kimi tanıdılmalıdır. Çünki bu xalq, azadlığı və təhlükəsizliyini belə şərəfli və vətənpərvər oğullara borcludur. Növbəti məqalələrdə digər canlı əfsanələri sizlərə tanıdacağıq.

(Qeyd: Zabitlərimiz haqqında məlumatlara görə “Hərbi Xəbərlər” səhifəsinə təşəkkür edirik)

Nicat İSMAYILOV