Dünən günorta saatlarından etibarən işğalçı Ermənistanın Tovuz istiqamətində törətdiyi təxribatlar səbəbi ilə baş verən əməliyaytlar davam edir.
Maraqlıdır, Azərbaycan mediası son bir gün, günyarımlıq qarşıdurmalar fonunda öz fəaliyyətini lazımi səviyyədə qura bilibmi? İstər cəmiyyətin operativ şəkildə məlumatlandırılması, istər rəsmi xəbərlərə istinad, istərsə də düşmən dezinformasiyaların ifşası baxımından medianın fəaliyyəti nə dərəcədə qənaətbəxşdir?
Moderator.az-a açıqlama verən Mətbuat Şurasının sədr müavini, Beynəlxalq Avrasiya Mətbuat Fondunun rəhbəri Umud Rəhimoğlu məsələ ilə bağlı bəzi nüasnlara toxunub:
“Təbii ki, istər media, xüsusilə də internet mediası, istərsə də sosial şəbəkələrdəki stuasiyanı ciddi şəkildə dəyərləndirmək lazımdır. Ehtiyatsız bir informasiya problemə səbəb ola bilər. Son günyarımlıq bir müddətdə medianın fəaliyyətini bu və digər baxımdan dəyərləndirmək çox çətindir.
Bu gün bütün Azərbaycan xalqı qələbə müjdəsini gözləyir. 30 ildir ki, biz bu xəbəri gözləyirik. 30 ildir ki, bizim qəlbimiz bu arzu, bu istəklə döyünür. Bilirəm ki, xalqımız qisas məqamı gələndə qalan bütün məsələləri bir kənara qoya bilir. Mən uğur qazanacağımıza inanır, həm ordumuza, həm dövlətimizə, həm də Azərbaycan insanına güvənirəm.
Baxın, niyə Ermənistan Tovuzu, sərhədyanı əraziləri seçib? Məqsəd Azərbaycanı KTMT ilə üz-üzə qoymaqdır. Lakin düşmən unudur ki, nə Azərbaycan ordusu, nə də Azərbaycan xalqı bu qədər sadəlövh deyil ki, belə təxribatlara getsin. Biz torpaqlarımızı azad edəcəyik.
Baş verən olaylar Ermənistan üçün ciddi dərs olmalıdır. Onlar anlamalıdırlar ki, artıq Qarabağ probleminin həlli vaxtı yetişib. Onlar rədd olub birdəfəlik torpaqlarımızdan getməlidirlər.
Mediamız öz fəaliyyətini ölkə xaricində də aktivləşdirməlidir. Bu gün beynəlxalq media qurumları bütün diqqətini Qafqaza, regionda baş verən proseslərə yönəldib. Çalışmalıyıq ki, beynəlxalq camiyənin doğru-dürüst məlumatlandıraq. Bu işdə bizim görəcəyimiz işlər çoxdur.
Mən şəhidlərimizə rəhmət, yaralı hərbçilərimizə şəfa diləyirəm. Allah Azərbaycan əsgərinə yar olsun”.
