Xarici ölkələrdə Azərbaycana dəstək aksiyaları davam edir. Ermənistanın son hərbi təxribatlarına etiraz və düşmənin xain hücumunun qarşısını böyük şücaətlə alan Azərbaycan Silahlı Qüvvələrinə dəstək məqsədi ilə bazar günü İsrailin Tel-Əviv Yafo şəhərində yürüş-mitinq keçirilib.
Bundan əvvəl iyul ayının üçüncü ongünlüyündə dünyanın bri çox ölkələrində Azərbaycana dəstək aksiyaları keçirilib. Bu aksiyaların əsas hədəfi Azərbaycana dəstək və ən əsası Ermənistanın təcavüzkar siyasətini ifşa etməkdir. Bu prosesin davamlı olması və dünyanın bütün ölkələrində Ermənistanın işğalçı siyasətinin ifşa olunması bir prosesə çevrilməsi lazımdır.
Bununla bağlı Sonxeber.az-a danışan deputat Ceyhun Məmmədov bildirib ki, bir neçə gündə baş verənlər onu göstərir ki, Azərbaycan diasporası formalaşıb, öz mövqeyini ortaya qoya bilir:
"Dünyanın bir çox ölkəsində eləcə də Amerikada, Belçikada bu istiqamətdə tədbirlər keçirildi. Həmin tədbirlər çox yaxşı effekt verdi. Ermənilərin də gözləmədiyi bir nəticə ortaya çıxdı. Adətən belə tədbirləri daha çox geniş miqyasda ermənilər keçirirdilər. Azərbaycanların da belə tədbir keçirməsi ermənilərdə ciddi qıcıq yaratdı. Bu cür aksiyaların keçirilməsi Azərbaycan və Qarabağ həqiqətlərin dünyaya çatdırılmasında xüsusi əhəmiyyət kəsb edir. Ermənilər illərdir azərbaycanlılara qarşı soyqırım aktları həyata keçirir, mülki əhalinin qətlə yetirir və torpaqlarımızı işğal altında saxlayır. Azərbaycanlıların həmrəy olaraq vahid mövqe ortaya qoyması erməniləri çox ciddi şəkildə qıcıqlandırdı".
Deputat qeyd edib ki, Ermənistanda diasporaya cavabdeh olan qurum da təmizləmə işləri həyata keçirdi:
"Bəzi insanlar vəzifədən azad edildi. Bu onu göstərdi ki, Azərbaycan diasporası ermənilərə qarşı vahid mövqe ortaya qoydu. Dünən də Azərbaycana dəstək məqsədi ilə İsraildə möhtəşəm tədbirin şahidi olduq. Qeyd edim ki,ermənilərin gərçək üzünün göstərilməsi baxımından dünənki aksiya xüsusi əhəmiyyət kəsb edir. Ermənistan diasporası çalışır ki, hə zaman erməniləri məzlum, zülümə, soyqırıma məruz qalmış xalq kimi təqdim etsin. Onlar bu yolla ayrı-ayrı dövlətlərin dəstəyini əldə etməyə çalışırlar. Biz bu sahədə gələcək fəaliyyətimizi daha da genişləndirməliyik. Azərbaycan və Türkiyə diasporası bir yerdə aktiv fəaliyyət göstərməlidir. Zaman keçdikcə son hadisələrdən də göründüyü kimi ermənilər artıq ifşa olunurlar. Bütün dünya onların həqiqi üzünü görməkdədir. Azərbaycanlılar aksiyaları sakit və dinc yolla keçirdikləri halda ermənilər kobud şəkildə bu kimi tədbirləri keçirib, müqavimət göstərməyə çalışırlar. Bununla bağlı Azərbaycanın Birinci vitse-prezidenti Mehriban xanım Əliyevanın da müraciəti oldu. Bu kimi aksiyalarda maksimum şəkildə soyuqqanlı və təmkinli olmalı və qanunları pozmamalıyıq. Haqlı olduğumuz yerdə haqsız vəiyyətə düşməməyə çalışmalıyıq. Ermənilər çox aqresivdir, özlərini ifşa edirlər. Biz çalışmalıyıq ki, yaşadığımız ölkələrin qanunlarına riyaət edib, sivil şəkildə aksiyalarımızı təşkil edək".
Aysel Yusifqızı
