Bu gün, 12 Avqust "Beynəlxalq Gənclər Günü"dür. 1999-cu ildə Baş Assambleya Gənclərlə bağlı məsələlər üzrə Nazirlərin Ümumdünya Konfransının 12 avqustun "Beynəlxalq Gənclər Günü" elan edilməsinə dair tövsiyəsini qəbul etmişdir.
EDNews.net xəbər verir ki, BMT ECOSOC yanında Əsas Məşvərətçi statusa malik, Azərbaycanda fəaliyyət göstərən Beynəlxalq Avrasiya Mətbuat Fondunun (BAMF) prezidenti Umud Mirzəyev bu münasibətlə gəncləri təbrik edib.
O bildirib ki, BAMF hər zaman yeni və kreativ ideyaları olan gənclərlə sıx çalışmaq fikrini dəstəkləyir.
“Təhsilli və qərar qəbul etmə prosesində iştirak hüququ olan gənclər dəyişiklik və tərəqqinin mühüm bələdçisinə çevrilirlər.
Təşkilat gənclərə dəstək olmaq və onların imkanlarını genişləndirmək məqsədi ilə beynəlxalq və yerli təşkilatlarla bir sıra humanitar layihələri uğurla həyata keçirir. BAMF UNİCEF ilə birlikdə müxtəlif bölgələrdə, o cümlədən müharibədən zərər çəkmiş rayonlarda gənc nəslin inkişafını dəstəkləyən Azərbaycan Gənclərinə Dəstək Proqramını hazırlamışdır.
Bundan əlavə, BAMF yerli və xarici vətəndaşlar üçün müxtəlif təlim, seminar, təhsil və təcrübə proqramları təklif edir. Ofisimizə gələn hər kəs BAMF ailəsinin üzvünə çevrilir və biz gənclərə yaxşı gələcəyi təmin etmək üçün hamı ilə əməkdaşlığımızı davam etdirməyə hazırıq.
Pandemiya dövründə təcrübəçi gənclərlə iş onlayn formata çevrilib", - deyə U.Mirzayev fikrini tamamlayıb.