Azər Qərib adı çəkiləndə ilk növbədə gözümüz önünə Azərbaycanın dilbər guşələrini, turizm potensialını təbliğ edən şəxs gəlir. Vaxtilə apardığı “Qərib Azəri” verilişi tamaşaçıların ən sevimli verilişlərindən idi.
Təəssüf ki, hazırda o veriliş də yoxdur. Ölkəmizdə tüğyan edən pandemiya isə turizmi də iflic halına salıb. Amma Azər Qərib ruhdan düşmür və turizmin bərpa olunacağı zamanı səbirsizliklə gözləyir. Ən böyük arzusu isə ötən il 44 günlük Vətən Müharibəsi zamanı işğaldan azad edilmiş Şuşaya və Kəlbəcərə getməkdir.
Azərbaycan Turizm Bloqerləri Assosiasiyasının İdarə Heyətinin sədri, məşhur “Oralar” verilişinin aparıcısı Azər Qəribov Eurasia Diary-yə açıqlamasında həmin günü səbirsizliklə gözlədiyini deyib.
“Şuşada uşaq ikən olmuşam. İsa bulağına, Cıdır düzünə və ümumiyyətlə Şuşada görməli yerlərin hamısına getmək istərdim. Əminəm ki, Şuşa şəhər olaraq, Azərbaycanın mədəni paytaxtı olaraq, ən qısa zamanda dünyanın ən gözəl turizm mərkəzlərindən birinə çevriləcək. Bilirəm ki, bu baş tutacaq. Ələlxüsus, bilirsiniz ki, Füzulidə hava limanı tikilir. Qarabağda yeni otellər tikilir. Ümidvarıq ki, yaxın zamanlarda Şuşaya gedən magistral yol tikilib qurtarandan sonra hamımızın ora səfər etmək imkanı olacaq”, A.Qəribov söyləyib.
O, azad edilən ərazilərlə bağlı hansısa layihələrin olub-olmaması sualına cavabında, “layihə var, amma o barədə hələ danışmaq istəməzdim”, dedi.
Azad olunmuş ərazilərin minalardan təmizlənməsi məsələsində nikbin olduğunu deyən bloqer, eyni zamanda çətinliklərdən də söz açıb: “Düzdür Füzuli, Ağdam, Cəbrayıl, Qubadlı, Laçın, Zəngilan, Kəlbəcər kimi minalardan daha çox əziyyət çəkən və dağıntı görən rayonlarda turizmin inkişafından danışmaq bir qədər tezdir. Ancaq Şuşada bunu etmək mümkündür”. A.Qəribov rəhbərlik etdiyi Assosiasiyanın fəaliyyətindən söz açıb. “Biz “Azərbaycan Turizm Bloqerləri Assosiasiyası” yaratmışıq.
Müharibədən sonra bizim hədəflərimiz bir qədər dəyişib. Hazırda hədəfimiz, bir nömrəli işimiz Azərbaycanda daxili turizmin inkişafına dəstək verməkdir. Əgər əvvəllər biz ikitərəfli istiqamətdə işləyirdiksə, fikirləşirdik ki, həm Azərbaycanı dünyada tanıtmaq, həm dünyanı Azərbaycana gətirmək, tanıtmaq lazımdırsa, hal-hazırda bir nömrəli məqsədimiz daxili turizmi dəstəkləməkdir. Çünki pandemiya zamanında turizm iqtisadiyyatın ən çox əziyyət çəkən sahələrindən biridir. Turizm dirçəldikcə insanların rifah halı da yaxşılaşacaq. Eyni zamanda, biz Azərbaycanı daha yaxşı tanımalıyıq. Ölkəmizin çox yerlərini gəzən, görən bir şəxs kimi deyirəm ki, Azərbaycanın hələ də tanımadığımız və kəşf ediləsi yerləri kifayət qədərdir”.