“Füzulidən mən böyük ürək ağrısı ilə qayıtmışdım, o yerləri görəndə düşmənə qarşı nifrət hissi bürüyür adamı”.
Eurasia Diary xəbər verir ki, bu sözləri Azərbaycan jurnalisti, bloqer, səyyah, Azərbaycan Turistlər Assosiasiyası İdarə heyətinin sədri Azər Qəribov Facebook hesabında paylaşıb.
“Hətta ən qəddar işğalçı ordular belə, işğal etdikləri ərazilərdə nəsə tikirdilər, quraşdırırdılar, yaradırdılar. Ermənistanı xarakterizə edən o oldu ki, 30 il ərzində o, işğal etdiyi Qarabağda heç nə yaratmadı, bir dənə də olsun bina tikmədi, əksinə, nə var idisə hamısını viran etdi, dağıtdı, oğurlayıb apardı. Lakin bu azmış kimi, Ermənistan işğal etdiyi ərazilərin hər qarışını minaladı. Digər xalqlar yerə ağac əkəndə ermənilər yerə minalar əkirdilər. Özü də ən vicdansız üsullarla, hərbi niyyətlə deyil, dinc adamları qırmaq niyyəti ilə - bulaq başında, əkin sahəsində, yolun qırağında, hətta dağıdılmış evlərin yanlarını da minalayıblar ki, evin sahibi olan azərbaycanlı qayıdanda minaya düşsün. Budur uydurulmuş mədəni tarixi ilə öyünən ölkənin əsl siması.
Bu gün Azərbaycan azad etdiyi ərazilərdə bərpa işlərini aparır, lakin bu işləri ləngidən məhz minalar problemidir. Ermənistan minalar xəritələrini verməkdən imtina edir, dünya isə buna susur. Əlbəttə, bərpa işləri istənilən halda davam etdiriləcək, bu torpaqlara həyat qayıdacaq və qayıdır, amma əgər Ermənistan həmin xəritələri versə, həm bizim işlərimiz sürətlənəcək, həm özlərini heç olmasa bir az sivil göstərə biləcəklər.
Bu, çox böyük problemdir, Qələbədən sonra 100 nəfərə yaxın insan minalara düşərək ya dünyasını dəyişib ya da yaralanıb, şikəst qalıb. Qarabağ minalarla zənginliyinə görə dünyada liderlər sırasındadır. Varmı bu vəhşiliyin izahı? Yoxdur.
Beynəlxalq Avrasiya Fondunda digər ictimai simalarla yanaşı mən də çağırış etdim, hamını petisiyaya imza atmağa çağırdım. İstəyimiz odur ki, dünya görsün, eşitsin, bilsin ki, biz inkişaf istəyirik, biz tərəqqi istəyirik, bizim məqsədimiz yaratmaqdır. Bunun üçün isə bizə minaların xəritələri lazımdır. Biz Qarabağı minalar cəhətdən deyil, dirçəliş sarıdan lider etmək istəyirik. Bilirəm, bəziləriniz "Əşşi, kimə lazımdır bu petisiyalar, kimdir onlara baxan" deyəcəksiniz. Amma mən bunları deyənlərlə razılaşmayacam. İstənilən halda bu, bir çağırışdır, bir ictimai etirazdır və nə qədər çox insan imza atsa, bir o qədər etirazın səsi çox eşidiləcək. Qoy verməsinlər xəritələri, ən azından dünyaya kimin kim olduğunu çatdıra biləcəyik. Bir dəqiqə vaxtınız gedəcək, atın imzanızı...
Petisiyanı imzalamaq üçün linkə daxil olun.