Bu gün Vətən müharibəsində şəhid olan hərbi feldşer Arəstə Baxışovanın doğum günüdür.
Moderator.az-ın əməkdaşı A.Baxışova haqqında tanınmış adamların fikrini öyrənib.
Millət vəkili, yazıçı Aqil Abbas Arəstəni XXI əsrin Həcəri adlandırıb:
“Arəstə Baxışova öz qəhrəmanlığı, qorxmazlığı və cəsarəti ilə tarixdə qalacaq. İki övladını qoyub müharibəyə getdi və şəhid oldu. Bunu hər qadın bacarmaz. Arəstə iyirminci əsrin Həcəridi. Allah cəmi şəhidlərimizi rəhmət eləsin. Ailəsinə səbr diləyirəm”.
“Müharibə Veteranı Qadınlarına Sosial Yardım” İctimai Birliyinin sədri, Qarabağ veteranı, cərrah Rada Abbas Arəstənin həmişə ürəklərdə yaşayacağını bildirib:
“Allah cəmi şəhidlərimizə rəhmət eləsin. Arəstə həmişə ürəklərdə yaşayacaq, xatırlanacaq. O, Vətən müharibəmizin tək qadın şəhididir. Biz həmişə onun ailəsini diqqətdə saxlayırıq. İki azyaşlı övladı qalıb, uşaqlara nənəsi baxır. Məişət şəraitləri də yaxşı deyil. Hələ 1990-ci ildən bu günə kimi Azərbaycan qadınlarının müharibədə rolu böyük olub. Şəhid olublar, əsir düşüblər, təcavüzə məruz qalıblar. Müharibə Azəraycan qadınının taleyində silinməz izlər buraxdı”.
Qeyd edək ki, A.Baxışova ölkə başçısı tərəfindən “Vətən uğrunda” medalı ilə təltif edilib.
Allah cəmi şəhidlərimizə rəhmət eləsin!