Bakı metrosunda 1 sərnişinin daşınması xərcinin 97 qəpik proqnozlaşdırıldığı barədə xəbərlər sosial şəbəkələrdə metroda gediş haqqının kəskin bahalaşacağı barədə müzakirələrə rəvac verib. Lakin Bakı Metropoliteni bildirir ki, bu sadəcə olaraq proqnozdur və qiymət artımı barədə şaiyələr əsassızdır. Üstəlik metronun nə vaxt açılacağı da məlum deyil.
“Bu gün sosial şəbəkələrdə qiymət artımı ilə bağlı məsələlərdən çox bəhs olunur. Məlumatlarda bir sərnişinin daşınmasına çəkilən xərcdən söhbət gedir”, -“Bakı Metropoliteni” Qapalı Səhmdar Cəmiyyətinin Mətbuat xidmətinin rəhbəri Bəxtiyar Məmmədov belə deyib.
Onun sözlərinə görə, metroda sərnişindaşıma bərpa olunanda, qiymətlərin 97 qəpik olacağı barədə yayılan məlumatlar tamamilə yanlışdır: “Hər bir sahədə olduğu kimi, metroda da proqnozlaşdırma var. Hesablanıb ki, əgər iyunun 1-də metro açılarsa və il ərzində təxminən 132 milyon sərnişin daşınarsa, bir sərnişinin daşınmasına çəkiləcək xərcin 97 qəpik olması gözlənilir.2019-cu ildə bir sərnişin 51 qəpiyə başa gəlib. Sərnişin 30 qəpiyə daşınıb. 2020-ci ildə bir sərnişin 1 manat 54 qəpiyə başa gəlib. 30 qəpiyə daşınıb. 97 qəpik isə proqnozlaşdırılandır. Bəlkə, metro iyunun 1-i açılmayacaq”.
B.Məmmədov onu da vurğulayıb ki, gözlənilən və ya proqnozlaşdırılan hələ fakt deyil:“Bəlkə, açılacaq, 132 milyon deyil, daha az və ya daha çox daşınacaq. Yəni qiymət faktiki daşınan sərnişinə görə bəlli olacaq. Amma qiymət artımı fərqli mövzudur. Maraqlanmaq istəyənlər üçün bildirim ki, hələlik Tarif Şurasına müraciət olunmayıb. Əsas vəzifə indi infrastrukturu qoruyub saxlamaqdır”.