Son zamanlar küçədə gəzərkən və ictimai nəqliyyatdan istifadə edərkən insanların tibbi maskadan istifadə etməməsi halına rastlaşmaq mümkündür. Bu, bir tərəfdən havaların istiləşməsi, digər tərəfdən nəzarətin azalmasıyla bağlıdır.

Hazırda ölkədə vaksinasiya olunanlarla yoluxanların ümumi sayı 2 milyon həddindədir. Başqa sözlə, əhalinin 20 faizi vaksinasiya olunub və ya yoluxub. Prosesinin başlanğıcında bildirilmişdi ki, vaksinasiya əhalinin 40 faizini əhatə etdiyi halda karantin rejiminin yumşaldılması mümkündür. Nəzərə alsaq ki, yay mövsümünün astanasındayıq, yumşaldılmalardan biri kimi maska məsələsinə baxıla bilərmi? Ümumiyyətlə hazırki statistika buna imkan verirmi?

“Əhalinin hələ 1 milyondan bir az artıq hissəsi vaksinasiya olunub. Yoluxmalar isə hələ ki, üçrəqəmli qalaraq, 300-350 civarındadır. Fikrimcə, hələ maska taxmağa davam etməliyik”.

Bu sözləri Eurasia Diary-yə Azərbaycan Tibb Universitetinin Yoluxucu xəstəliklər kafedrasının əməkdaşı, infeksionist Vüqar Cavadzadə deyib.

“Keçən ilin yay aylarında yoluxmalar 300-350 civarında idi. Və o zaman biz sərt karantin dövründə yaşayırdıq. Göstəricilərin aşağı düşməsi bizi hələ arxayınlaşdırmamalıdır ki, koronavirus yox olacaq. Xeyr, koronavirus hələ cəmiyyətdə var. Düzdür, havanın temperaturu qalxıb, insanların maska taxması nəfəs alma ilə bağlı çətinləşib. Ancaq koronavirus isti havadan daha təhlükəlidir. Buna görə də maska taxmağa davam etməliyik. Digər tərəfdən, buna paralel olaraq vaksinasiya prosesi sürətləndirilməlidir ki, nəticədə biz maskadan tədricən azad olaq”.

Ekspert qeyd edib ki, əhalinin yarıdan çoxu vaksinasiya olunan bəzi ölkələrdə maska qadağası ləğv edilir.

“Hesab edirəm ki, vaksinasiya olanlara müəyyən güzəştlər olmalıdır ki, digər şəxslər də o güzəştləri görüb bir növ vaksinasiyaya maraqları olsun. Başqa sözlə prosesi stimullaşdırsın və insanlar ona üz tutsun. Sərt karantin rejimi bərpa olduqda maskadan azad olsunlar. Və ya müəyyən yerlərə gedəndə vaksinasiya olunanlar o tədbirlərdən uzaq olsunlar”. 

Ekspert, həmçinin əlavə edib ki, göstəricilərin 300 nəfərə düşməsi bizi arxayın etməməlidir.

“Çünki keçən ilin may ayında hətta yoluxmalar 20 nəfərə qədər düşmüşdü. İnsanlar arxayınlaşdı və yenidən yoluxmalar baş verdi. Yoluxma sayının üçrəqəmli olması bizi arxayın etməməlidir. Yenə profilaktik tədbirlərimizi davam etməliyik. Özümüzü, ətrafdakıları və yaxınlarımızı qorumalıyıq”.

Gülnar Səlimova

EurasiaDiary © Xəbərlərdən istifadə zamanı hiperlinklə istinad olunmalıdır.