Azərbaycan Respublikasının Prezidenti İlham Əliyev tərəfindən “Dostluq” ordeni ilə mükafatlandırılan israilli jurnalist, politoloq, tanınmış ictimai-siyasi fəal Arye Quta ötən gün mükafat təqdim olunub. O, bu yüksək ordenlə dövlət başçısının kütləvi informasiya vasitələri nümayəndələrinin təltif edilməsi haqqında 22 iyul 2020-ci tarixli Sərəncamına əsasən təltif edilib.
Arye Qut 2 iyun 1975-ci ildə Bakı şəhərində anadan olub. Bakı Dövlət Universitetinin beynəlxalq münasibətlər fakültəsini Fərqlənmə diplomu ilə bitirib. Sonra müəllimlik təcrübəsi keçmək məqsədi ilə İtaliyanın Genova Universitetinə göndərilib. Üç il ərzində Bakı Dövlət Universitetinin ən gənc müəllimlərindən biri idi. Beynəlxalq münasibətlər sahəsində magistr elmi dərəcəsi var. Arye Qut Azərbaycan, rus, ingilis, ivrit, türk və alman dillərində sərbəst danışır. 2000-ci ildə İsrail Dövlətinə köçüb. 2002-2009-cu illər ərzində Arye Qut tanınmış “GİLRO LTD” İsrail şirkətində idxal-ixrac departamentin rəhbəri çalışıb. 2007- 2009-ci illərdə Arye Qut Türkiyənin İsraildəki səfiri Namiq Tanın siyasi müşaviri vəzifəsində işləyib. Bununla yanaşı, Arye Qut İsrail-Türkiyə və İsrail-Azərbaycan münasibətləri sahəsində İsraildə aparıcı mütəxəssislərindən biri kimi tanınır. Eyni zamanda, İsrailin dövlət radiosunda “Radio Reka” (rus dilində), “Reşet Bet” (ivrit dilində) və İsrailin 9 və 10 televiziya kanallarında daimi siyasi şərhçi kimi çıxış edir.
Arye Qut həmçinin İsrailin hərbi sənaye kompleksində çalışır və bu strukturda post-Sovet məkanında olan ölkələr sahəsində nüfuzlu mütəxəssislərindən biri hesab olunur. Eyni zamanda İsrailin Müdafiə Nazirliyində Arye Qut siyasi analitik və Cənubi Qafqaz regionu üzrə aparıcı mütəxəssislərdən biri hesab olunur. Arye Qut həm İsrail, həm Azərbaycan mətbuatı ilə fəal şəkildə əməkdaşlıq edir. O, Türkiyə-İsrail münasibətləri, İsrail və Azərbaycan strateji tərəfdaşlığı, Cənubi Qafqazda geosiyasi vəziyyət, Ermənistan-Azərbaycan münaqişəsi ilə bağlı 700-dən artıq analitik məqalələrin müəllifidir. 2016-cı ildən Arye Qut Bakı Beynəlxalq Multikulturalizm Mərkəzinin İsraildəki nümayəndəliyinin rəhbəri kimi fəaliyyət göstərir.
Qeyd edək ki, “Cəmiyyət üçün beynəlxalq layihələr” təşkilatının başçısı, Bakı Beynəlxalq Multikulturalizm Mərkəzinin İsraildəki nümayəndəliyinin rəhbəri, siyasi analitik, “The Jerusalem Post” qəzetinin siyasi şərhçisi, jurnalist Arye Qut İsraildə Azərbaycan diasporunun fəal nümayəndələrindən biridir. Vaxtilə “İsrail-Azərbaycan” Beynəlxalq Assosiasiyasının idarə heyətinin üzvü və təşkilatın mətbuat katibi olub. Bununla yanaşı o, İsrail dövlətində “Justice for Khojaly” beynəlxalq kampaniyasınin rəsmi əlaqələndiricisidir.
Arye Qut təkcə keçən 4 il ərzində dünyanın ən nüfuzlu ingilisdilli qəzet və jurnallarında, aparıcı xəbər portallarında Azərbaycana erməni təcavüzü ilə bağlı 50-dən yuxarı yazı yazıb. Məhz onun sayəsində İsrailin və dünyanın yəhudi əsilli jurnalistlərinin böyük əksəriyyəti Azərbaycanın haqq səsinin dünyaya yayılmasına dəstək olur.
Arye Qutun Beynəlxalq Avrasiya Mətbuat Fondunun prezidenti Umud Mirzəyevlə yaxın dostluq əlaqələri var. Bakıya səfəri zamanı mütləq BAMF ofisinə baş çəkən Qut, İkinci Qarabağ müharibəsindən öncə və sonra dəfələrlə Umud Mirzəyevlə birgə Qarabağda olub. O, həmçinin EDNews.net-in siyasi şərhçisi kimi də çıxış edir.
Arye Qut nüfuzlu ingilisdilli “The Jerusalem Post” qəzetinin siyasi şərhçisi olmaqla yanaşı, məqalələri “Maariv”, “Makor Rişon”, “Ha-Aretz” qəzetlərində və başqa nəşrlərdə çap olunur. O, Ermənistan-Azərbaycan münaqişəsi haqqında, Azərbaycan haqqında, onun qədim mədəniyyəti, tolerantlıq ənənələri, Azərbaycan multikulturalizm modeli haqqında İsrail televiziyasının birbaşa efirində xatırlatmaq üçün hər bir nəşrdən, hər bir imkandan istifadə etməyə çalışır. O, öz ölkəsinin media aləmində tanınmış şəxslərini – jurnalistləri, yazıçıları, deputatları, ictimai xadimləri Azərbaycana gətirir, onlar Bakıda və regionlarda keçirilən ən müxtəlif mədəni-humanitar aksiyalarda iştirak edirlər.
Bundan öncə Arye Qutun xidmətləri ona Azərbaycan Prezidenti İlham Əliyevin imzası ilə Fəxri Fərmanın təqdim olunması ilə də qeyd edilib. İlham Əliyev bu diplomu çox nadir hallarda təqdim edir və o vaxta qədər bu diplom əcnəbi şəxslərə verilməyib. 2014-cü ildə Bakıda keçirilən humanitar forumda Arye Qut Azərbaycan Prezidenti İlham Əliyevlə dialoq zamanı ölkə başçısı ona “Arye, mən sizi yaxşı tanıyıram, sizin analitik məqalələrinizi tez-tez oxuyuram. Düzgün və ədalətli mövqe tutduğunuza görə sağ olun” deyə bildirib.
Dostluq ordeni ilə təltif olunan Arye Qut öz hislərini EDNews-la bölüşüb.
“Təbii ki, bu orden mənim üçün böyük fəxr və məsuliyyətdir. Fəxrdir ona görə ki, mən doğma vətənim Azərbaycan üçün gördüyüm işlərə görə mükafatlandırılmışam. Və bu mükafata məni Azərbaycan Prezidenti cənab İlham Əliyev layiq görüb. Bu həm də Azərbaycan Prezidentinin mənə olan dəstəyini nümayiş etdirir. Deməli, gördüyümüz işlər, çəkdiyimiz əziyyətlər boşuna deyil və biz də az və ya çox dərəcə vətənimiz üçün çalışmışıq və fəaliyyətimiz ən ali səviyyədə qiymətləndirilib.
Mən eyni zamanda, Umud Mirzəyevə də təşəkkür etmək istəyirəm. Bilirəm ki. mənim "Dostluq" ordeninə təqdimatımda BAMF prezidentinin də böyük rolu olub. Bundan əlavə, onu da qeyd etmək istəyirəm ki, mən Qarabağa elə-belə getməmişəm. Mənim bölgəyə ilk səfərimi də məhz Umud Mirzəyev təşkil edib.
Həmçinin, “Dostluq” ordeni ilə təltif olunmaq mənim üzərimə böyük bir məsuliyyət yükləyir. Çünki bundan sonra bu ordeni almış biri kimi Azərbaycan üçün ikiqat artıq çalışmalıyam. Mən həmişə çalışmışam ki, hər yerdə Azərbaycanın problemlərini qaldırım və doğma vətənim üçün əlimdən gələni edim. Mənim mətbuatdakı bütün fəaliyyətim boyu Qarabağ problemi, Xocalı soyqırımı, qaçqın və məcburi köçkünlərin həyatı ön xətdə olub. Və bu xətt davam edəcək!"
Beynəlxalq Avrasiya Mətbuat Fondu Arye Qutu “Dostluq” ordeninin təqdim edilməsi münasibətilə təbrik edir, fəaliyyətində uğurlar arzu edir.