Sülhün Kökləri təşkilatının Qlobal Vətəndaş Mükafatı virtual tədbiri keçirilib. Vebinara Beynəlxalq Avrasiya Mətbuat Fondunun (BAMF) prezidenti Umud Mirzəyev də qoşulub. Fond prezidenti təşkilatın fəaliyyəti ilə yaxından tanış olub.
Sülhün Kökləri təşkilatının Qlobal Vətəndaş Mükafatı müharibə yaralarını sağaltmaq və kənd təsərrüfatı vasitəsilə davamlı sülhü möhkəmlətmək səylərinə böyük töhfə vermiş dörd layiqli namizədə təqdim edilib. Görüş zamanı təşkilatın son illər ərzində Əfqanıstanda gördüyü önəmli işlərdən danışılıb və dünyanın diqqətini bu məsələyə yönləndirmənin vacibliyi vurğulanıb.
1997-ci ilin sentyabrında əsası qoyulmuş humanitar-qeyri-kommersiya təşkilatı olan Sülhün Köklərinin təsisçisi və baş direktoru xanım Haydi Kühndür. Təşkilat "Minaları üzümlərə çevirək" şüarı ilə çıxış edir və əsas məqsədi mina bəlasını davamlı kənd təsərrüfatı əkin sahələri ilə əvəz etməkdir. Haydi Kühn vebinarda son 24 il ərzindəki fəaliyyətləri haqqında təqdimatla çıxış edib. Bu günə qədər Sülhün Kökləri səkkiz ölkədə - Əfqanıstan, Anqola, Bosniya-Herseqovina, Kamboca, Xorvatiya, İraq, İsrail, Fələstin və Vyetnamda 1 milyondan çox fermer və ailənin həyatının yaxşılaşdırılmasına köməklik edə bilib. Haydi Kühnün səyi nəticəsində Əfqanıstanda kənd təsərrüfatı məhsullarının ixracının 2014-cü ildə 250 milyon dollardan 2020-ci ildə artıq 1,4 milyard dollara yüksəlməsinə nail olunub. İndiyə qədər Sülhün Kökləri 100 mindən çox mina və Partlamamış Hərbi Sursatın (PHS) təmizlənməsində iştirak edərək həmin torpaqları kənd təsərrüfatına yararlı olması üçün bərpa edib.
Onu da qeyd edək ki, 2020-ci ilin aprelində xanım Haydi Kühnün “Ground Breaking Ground” adlı kitabı nəşr olunub. Bu xatirə kitabı olmaqla yanaşı, həmçinin fəaliyyətlərə çağırış xarakteri də daşıyır. Kitab Haydinin yer üzündə minaları tamamilə məhv etmək və sülhün köklərini möhkəmlətmək axtarışının əyani təsviridir.
Qeyd edək ki, Beynəlxalq Avrasiya Mətbuat Fondu Sülhün Kökləri təşkilatının rəhbəri xanım Haydi Kühnlə gələcək əməkdaşlıq və Azərbaycana səfərlə bağlı danışıqlar aparır.