“Azərbaycan Televiziyası və Radio Verilişləri” QSC-də Beynəlxalq Avrasiya Mətbuat Fondunun (BAMF) təşkilatçılığı ilə  “Səngər adamları” adlı kitabın təqdimatı keçirilir.  

EDNews.net-in xəbərinə görə, tədbirdə ölkənin tanınmış imza sahibləri, politoloqlar, millət vəkilləri, media rəhbərləri və istər 44 günlük 2-ci Qarabağ savaşı dövründə, istərsə də 30 illik işğal zamanı Ermənistanın Azərbaycana qarşı haqsız müharibəsində canlarını fəda etmək uğrunda qələmini silaha çevirən azərbaycanlı jurnalistlər, eləcə də bu yolda canından keçib şəhidlik zirvəsinə ucalan söz sahiblərinin yaxınları iştirak edirlər.

Təqdimatı giriş sözü ilə açan "Azərbaycan Televiziya və Radio Verilişləri” Qapalı Səhmdar Cəmiyyətinin sədri Rövşən Məmmədov öncə kitabın ərsəyə gəlməsində əziyyəti olan şəxslərə, “Səngər adamları”nın təqdimatını öz üzərinə götürən BAMF və təşkilatın rəhbəri Umud Mirzəyev, eləcə də qonaqlara təşəkkürünü çatdırıb.

Daha sonra Rövşən Məmmədov bu il iyunun 4-də Kəlbəcər ərazisində çəkiliş aparan zaman düşmən minasına düşərək həlak olan AzTV-nin operatoru Sirac Abışov barəsində danışıb: “Sirac özünü bu işə həsr etmişdi. Ona dəfələrlə zəng etməyimizə baxmayaraq, Bakıya qayıtmırdı. Hələ işlərinin olduğunu deyirdi. Çox sevinirik ki, “Səngər adamları” kitabında jurnalistlərimizin fəaliyyəti əbədiləşdirilir. Bu monoqrafiyanın ərsəyə gəlməsində rolu olan şəxslərə təşəkkür edirəm”.

Qeyd edək ki, kitab 162 səhifədən ibarətdir. “Səngər adamları”nın ideya müəllifi  Beynəlxalq Avrasiya Mətbuat Fondunun(BAMF)  prezidenti Umud Mirzəyev, redaktorlar Cahangir Məmmədli, Mübariz Piri, tərtib edən Şöhrət Eyvazov, məsləhətçi Rey Kərimoğludur.