Ukraynada gedən döyüşlər zamanı əlacsız qalan azərbaycanlı tələbələr hələ də döyüşlərin getdiyi qaynar nöqtədə qalıblar.
Bu barədə Kiyevdə təhsil alan tələbələrdən biri Rüstəm Muxtarov məlumat verib. O, Ednews-a verdiyi özəl açıqlaması zamanı bu gün onların Ukraynadan çıxarılması barədə yayılan yalan xəbərlərdən də danışıb.
İlk olaraq, azərbaycanlı tələbə bildirib ki, onların sayı xəbər portallarında qeyd olunduğu kimi 10 deyil, 8 nəfərdir.
"Mən və 7 azərbaycanlı tələbə Vadim Getman adına Kiev Milli Ticarət və İqtisadiyyat Universitetində təhsil alırıq".
Xəbərin doğru olduğunu təkzib edən həmyerlimiz hazırda Azərbaycanda yox, Ukraynada olduqlarını, universitetin bunkerlərindən sığınacaq kimi istifadə etdiklərini bildirib.
"Şəhərdə axşam 20:00-dan sonra komendant saat rejimi tətbiq olunub. O zaman kimi biz lazımı ərzaq və qeyri qida məhsullarını yaxınlıqdakı mağazalardan əldə edirik. Komendant saatı başladıqdan sonra isə qeyd olunan bunkerlərə sığınırıq".
Azərbaycanlı soydaşımız olduqları ərazidəki vəziyyətlə də bağlı Ednews-u məlumatlandırmağı unutmadı.
“Hazırda olduğumuz ərazidən 8-10 km-lik məsafədə qızğın döyüşlər gedir. Atışma səsləri mütəmadi olaraq eşidilir. Bizi qaldığımız ərazidən təxliyyə etmələri üçün Azərbaycan Səfirliyinə müraciət etdik. Lakin oradan bizə Polşa və Çexiya-Moldova sərhədinə yaxınlaşacağımız təqdirdə təxliyyə olunacağımıza yardımçı ola biləcəklərini qeyd etdilər. Hazırki vəziyyətdə isə bizim ora getməyimiz həyatımızı təhlükə altına ala bilər. Bu səbəbdən hələ ki, olduğumuz yeri tərk etməməyimiz daha məqsədəuyğundur".
Rüstəm həmçinin Türkiyə Səfirliyi ilə də mütəmadi əlaqə saxladıqlarını qeyd edib. "Qardaş Türkiyə Ukraynada təhsil alan vətəndaşlarının təxliyyəsi zamanı bizə də yardımçı olacaqlarını bildiriblər. Onlar öz həmyerliləri ilə bərabər azərbaycanlı tələbələri də qaynar nöqtədən çıxarmağı planlaşdırırlar".
Müsahibimiz Rüstəm həmçinin yaxın 2 gün ərzində istifadə etməyi bacaran mülki vətəndaşların da silahla təmin olunacağını deyib.
"Silahdan müəyyən qədər anlayışı olan mülki şəxslərə də özlərini müdafiə etmək üçün təlimlər keçiriləcək".
Zeynəb Nadirova
.jpg)
