Xəbər verdiyimiz kimi bu gün Bakı Fairmount Hotelində Azərbaycan Minalatəmizləmə Agentliyi (ANAMA), Birləşmiş Millətlər Təşkilatının İnkişaf Proqramı (BMTİP) tərəfindən humanitar minatəmizləmə fəaliyyəti və Dayanıqlı İnkişaf Məqsədləri (DİM) mövzusunda beynəlxalq konfrans keçirilir.
Azərbaycan himni ilə açıq elan edilən tədbirdə əvvəlcə nümayəndə heyətinin Ağdama səfəri ilə bağlı video nümayiş etdirilib.
Tədbiri giriş sözü ilə açan ANAMA nın rəhbəri Vüqar Süleymanov minaların dünyada və ölkəmizdəki fəsadları ilə bağlı danışıb.
"Bu konfrans bizim üçün həm də əməkdaşlıq və inkişaf üçün önəmli bir platformadır. Azərbaycan hökumətinin təşəbbüsü ilə Azərbaycan Respublikasının Minatəmizləmə Agentliyinin və BMT-nin İnkişaf Proqramının birgə təşkilatçıığı ilə ərsəyə gələn bu konfransa dünyanın 34 ölkəsindən 150 nəfərə yaxın iştirakçı qatılır. Düşünürəm ki, bu konfrans mina problemi ilə bağlı qlobal gündəlikdə dayanan ən mühüm məsələlərin işıqlandırılması və həlli üçün müzakirələrin təşkilində münbit mühit olacaq. Konfransın mövzusu Azərbaycan üçün ən aktual məsələlərdən biridir. Azərbaycanın Qarabağ bölgəsi mina və partlamamış hərbi sursatlarla çirklənmə səviyyəsinə görə dünyada ilk pillələrdə yer alır. Dünən Ağdama səfər edən konfrans iştirakçılarının problemin miqyası ilə əyani daha yaxından tanış olmaq imkanı olub.
Bu məsələ Azərbaycan Prezidentinin daim diqqətindədir və bu istiqamətdə fasiləsiz işlər görülür. Xüsusilə post münaqişə dövründə ANAMA-nın insan resursları, əməliyyat metodları inkişaf etdirilmişdir. Azərbaycan Prezidentinin göstərişlərinə uyğun olaraq Azərbaycanda minatəmizləmə işlərinin həm mahiyyətcə, həm də yeni bir mərhələsinə keçid istiqamətində mühüm addımlar atılır. Minaları yerləşdirmək asan, lakin onları təmizləmək çətindir. Azərbaycanın 2030-cu ilədək milli prioritetləri sırasında azad edilmiş ərazilərin bərpası və bu ərazilərə həyatın qaytarılması əsas strateji hədəflərdən biri kimi müəyyən edilib",-deyə o bildirib.