Bir müddət öncə paytaxt restoranların birində baş verən lift qəzası bu mövzunu yenə gündəmə gətirib. Mütəmadi olaraq, yaşanan bu hadisələr insan həyatını təhlükəyə atır, hətta ölümlə də nəticələnir.
Çünki paytaxtda köhnə tikili binalarda istismara yararsız liftlər hələ də sakinlərin istifadəsindədir. Onlar sanki liftdən istifadə etdikdə mənzillərinə yox, əcəllərinə tərəf gedirlər. Sakinlər isə şikayətlərində bildirirlər ki, “Lifttəmir” İstehsalat Birliyi mövcud olan vəziyyətə diqqət etmir və buna məsuliyyətsiz yanaşırlar.
Ümumiyyətlə, ən təhlükəsiz nəqliyyat vasitəsi olan lifti təhlükəli edən nədir?
Liftləri təhlükə potensiallı obyektlər siyahısına daxil edən təhlükəsizlik eksperti Elmar Nurəliyevin sözlərinə görə, problemlərin qarşısının alınması həlli yalnız müntəzəm olaraq yoxlanmaqda görür.
.
“İstifadə zamanı təhlükəsizlik qaydalarına çox ciddi riayət edilməlidir. Zəruri olan bütün texniki dövlət standartları, yanğın təhlükəsizliyi, fövqəladə, sanitar baxımından, ümumiyyətlə, baş verə biləcək qəzaların qarşısını almaq üçün onların quraşdırılması, təmiri dövlət və təhlükəsizlik standartlarına cavab verən sertifikartlaşdırılmış materiallardan istifadə edilməlidir. Liftlər müntəzəm olaraq yoxlanmalı, istismar müddəti bitmiş avadanlıqlar dəyişdirilməli və ya təmir edilməlidir. Liftlər hansı qurumun balansındadırsa, onlar bu qurğuların təhlükəsizliyini təmin etməlidirlər. Məsələn mənzil təsərrüfat birliyi, bələdiyyə, yerli icra nümayəndəliyi və s. Onlar qurumlar mütəmadi olaraq yoxlamaları həyata keçirirlər. Ancaq digər sahibkarlıq subyektlərində isə bir qədər fərqlidir. Restoran, kafe kimi şəxsi obyektlərdə quraşdırılan liftlərə həmən obyektin icarədarları cavabdehdirlər. Həmən şəxsin də vəzifə öhdəliyi odur ki, liftin təhlükəsizlik istismarını təmin etsin. Bura nasazlıqdan tutmuş,digər problemlər daxildir“.
Bəs, liftlərin istismarı prosesi necə tənzimlənməlidir ki, belə problemlərin sayı azalsın? Ekspertə ünvanladığımız suala o, belə cavab verib.
Liftlərlə bağlı ümumi manitorinq keçirilsin…
“Reallığa baxsaq görərik ki, istismar müddətini başa vuran təhlükəli liftlət var ki, istifadəyə tam yararsızdır.Ona görə mütləq bununla bağlı ümumi monitorinq keçirilsin. Hətta deyərdim ki, istifadəyə yarasız, insanların həyat və sağlamlığına təhükə yaradan liftlərin təmiri və yenilənməsindən başlanılsa daha məqsədəuyğun olar”.
Məsələ ilə bağlı problemlərə hansı qurumun baxdığı məlumdur. Bakı Şəhər “Lifttəmir” İstehsalat Birliyindən Ednews-ə verilən məlumata görə, 2020-21-ci illərdə ayrılan vəsait hesabına istismar müddəti bitmiş 1200-ə yaxın lift yenilənib.
“Ölkə başçısının imzaladığı sərəncamın icrası ilə bağlı Bakı Şəhər “Lifttəmir” İstehsalat Birliyi tərəfindən Almaniyanın "Wittur Holding GMBH" şirkəti ilə müqavilə imzalanaraq 2020-ci ildə 581 ədəd yeni lift Bakıya gətirilərək quraşdırılıb. Həmin işlərin davamı olaraq 2021-ci ildə daha 625 liftin alınıb quraşdırılması təmin edilib. Alınan liftlərə xidmət göstərilməsi üçün mərkəzi dispetçer xidmət sistemi qurulub, onlar lazımı texniki avadanlıqlarla təchiz edilib və liftlərin göstəriciləri daim nəzarətdə saxlanılır. Yeni liftlər istismara verildikcə bu məntəqəyə qoşulur “.
Həmçinin qurumdan verilən məlumata görə liftlərə operativ xidmətin göstərilməsi üçün altı ədəd yeni avtonəqliyyat vasitəsi də alınıb. Bu proses qarşıdakı müddətdə də mərhələli şəkildə davam edəcək.
Lakin bina sakinləri lift təmiri və yenilənməsi üçün onlardan pul tələb olunduğu bildirirlər. Bu, demək olar ki, əksər köhnə binalarda yaşayan sakinlərin üzləşdikləri problemdir.
Qurum isə cavabında yayılan bu iddiaları təkzib edərək bildirib ki, yığılan vəsait liftlərin təmiri və yenilənməsi üçün deyil, cari xidmətlərə görə olduğunu bildirib.
“Əgər binanın lift təmir işləri bizim balansımızdadırsa, bu zaman mənzil sahibləri bunun üçün heç bir vəsait ödəmi ödəmir. Çünki bu prosesi biz həyata keçiririk. Amma bəzi mənzillər özəl şirkətlərə aid olduğu üçün orada bu xidmətlər ödənişli ola bilər”.
Ləman Abbaslı