Dünya düzəninin və insanların alışdıqları həyat tərzlərini məcburi şəkildə dəyişməsi (pandemiya, müharibə və.s) onlarda aqressiya, əsəbilik yaratması haqqında çox məlumatlar var. Psixoloqların fikrincə, məhz bu amil insanlarda qıcıq yaradır və belə insanlar da əsəblərini, həyata olan acıqlarını ətrafındakılardan çıxarmaq istəyir. Bu isə insanların günlərinin demək olar ki, əsas hissəsini keçirdikləri iş yerlərində intriqaların yaranmasına səbəb olur.
İş yerlərində yaranan bu anlaşılmazlıqlar işçinin qarşılaşa biləcəyi ən böyük problemlərdən biridir. Çünki yaranan belə hallar işçilərin motivasiyasını və işin keyfiyyətini aşağı salır. Hətta yaşanan konflikt işdən çıxarılma ilə də nəticələnə bilir.
Lakin bu intriqalar başqa səbəblərdən də yarana bilir. Məsələn aşağı məvacib, əlavə işlər, uzun iş saatları da bu intriqalara, narazılıqlara yol aça bilər. İstər rəhbər və işçi, istərsə də işçilərin özləri arasında yaranan anlaşılmazlıq konfliktə çevrilməyə də bilər.
Ciddi iş mühitini xaotikliyə sürükləyən qalmaqalların yaranma səbəbi nələrdir?
Aşağı maaş, sistemsizlik, yoxsa...
Mövzu ilə bağlı psixoloq Fərqanə Mehmanqızı Ednews-a açıqlaması zamanı qeyd edib ki, bu intriqaların səbəbləri müxtəlif və eyni ola bilər.
“Hər kəs işdə, özəl həyatda, ailədə rəftarını, münasibətlərini öz xarakterinə, psixologiyasına, aldığı travmalardan yaratdığı düşüncəyə uyğun aparır. Ona görə də elə insanlar var ki, onlar intriqant adamlardır. Həmin adamlar bir yerə düşdükləri zaman bu böyük problemə gətirib çıxarır və şirkətin iş keyfiyyətinin aşağı düşməsi ilə nəticələnir. Bundan başqa bu cür qalmaqallar ciddi şirkətlərin imicinə də böyük ziyan vurur”.
Psixoloqun sözlərinə görə, bunun qarşısını almaq üçün sadəcə kadrlar şöbəsi işə götürülənləri düzgün analiz etməli və düzgün şöbələrə bölməlidir ki, iki-üç intriqa sevən insan bir yerə düşməsin.
“Bu çox önəmlidir. Buna görə də kadrlar şöbəsi mütəxəssislərlə işləməli, yaxşı psixoloq olmalı, yaxşı psixoloji dərslər almalıdırlar. Ümumiyyətlə, intriqanın səbəbi hər bir insanın xasiyyəti ilə birbaşa bağlıdır. İntriqa da, söz-söhbət də yoluxucu xəstəlik kimi insanların birindən digərinə yayılır”.
Ekspert məvacibin yuxarı yaxud da aşağı olmasının da buna təsir etdiyini vurğulayıb.
“Yüksək maaş olan yerdə bir az etik cəhətdən daha soyuq müharibələr gedir. Amma aşağı maaş verilən işdə bir qədər aqressiya daha çox olur. İnsanlar aqressiyasını daha tez bildirir və gedib başqa yerdə də iş tapa bilərəm düşüncəsi onların hirslərini daha çox rahat şəkildə bildirməsinə gətirib çıxarır.
Maaş az olduqda stress yüksək olur, amma bu yenə də insanın xasiyyətindən asılıdır. Gülərüz və rəhbərliklə mehriban olan xadimələr də var, işçiləri ilə pis rəftar edən rəhbərlər də. Bu xarakterə, həyata, ictimai baxışa bağlı məsələdir. Uşaqlıqda aldığı travmalardan, tutduğu mövqeyə necə gəlməsindən asılıdır”.
Gülnar Səlimova
.jpg)
