“Eurasia Diary” Beynəlxalq Analitik İnformasiya Portalının Orta Asiya üzrə xüsusi müxbiri Şuhrat Salamov Barlas yüksək mükafata layiq görülüb.
Ednews xəbər verir ki, o, Azərbaycanın Özbəkistandakı Səfirliyi və Daşkənd şəhərində yerləşən Heydər Əliyev adına Azərbaycan Mədəniyyət Mərkəzi tərəfindən Özbəkistanın milli mükafatı olan 16-cı “Qızıl qələm” nominasiyasında – “Azərbaycan həqiqətlərinin dünyaya çatdırması yolunda” xidmətinə görə təltif olunub. Mükafatı Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov təqdim edib.
Xatırladaq ki, Şuhrat Barlas Qarabağın işğalı zamanı baş verən real hadisələri işıqlandıran ən yaxşı müəllif kimi dünyanın bir çox ölkələrində ictimai təşkilatların müxtəlif mükafatlarına layiq görülüb. Onun regionda baş verən hadisələrinin operativ işıqlandırılmasında, Qarabağ həqiqətlərini və Azərbaycanın haqq səsinin dünyaya çatdırılmasında misilsiz xidmətləri olub.
Şuhrat Barlasın 2017-ci ildə Özbəkistanda yaşayan etnik ermənilərin Azərbaycanın işğal olunmuş ərazilərinə təşkil etdikləri qanunsuz səfərinin qarşısının alınmasında böyük rolu olub. Sözügedən hadisə barədə “Eurasia Diary” xəbər portalında araşdırma məqaləsi dərc olunan müəllif sonunda “Daşkənd-İrəvan-Daşkənd” çarter reysinin ləğvinə nail olub. Hətta o zaman reysə satılan biletlər də alıcılara geri qaytarılıb.
O, 2016-cı ildə işıq üzü görən “Türküstan və 19-20-ci əsrlərin Cənubi Qafqazı. Daşnaklar Fərqanədən Qarabağa” kitabında, türk etnosunun məskunlaşdığı geniş ərazidə erməni millətçilərinin törətdikləri vəhşilikləri faktlarla isbat edib.
Bundan başqa Ş. Barlasın 2017-ci ildə özbək dilində nəşr olunan “Ғоялар Жанги” nəşrində isə “Daşnaksutyun” erməni terror partiyasının daha bir vəhşi əməli - Şərqi Anadolu, Cənubi Qafqaz, Dağlıq Qarabağ və Türküstanda törətdiyi soyqırımdan bəhs edilib.
Elə həmin ildə də Azərbaycan Milli Elmlər Akademiyası tərəfindən Şuhrat Barlasa “Fəxri Doktor” adı təqdim edilib.
Fəaliyyəti ilə Azərbaycan və Özbəkistan arasında dostluq əlaqələrinin möhkəmləndirilməsinə xidmət edən Şöhrat Barlas bütün yüksək mükafatlara layiqdir.
Beynəlxalq Avrasiya Mətbuat Fondunun Prezidenti Umud Mirzəyev başda olmaqla, bütün “Eurasia Diary” komandası həmkarımız Şuhrat Barlası təbrik edir və ona fəaliyyətində daha uca zirvələri fəth etməyi arzu edirik.