Beynəlxalq Avrasiya Mətbuat Fondunun (BAMF) baş ofisində “Media savadlılığı jurnalistlər üçün” adlı layihə çərçivəsində nəşr olunan eyniadlı bələdçi kitabın təqdimatı keçirilib. 

 

Tədbirin əvvəlində BAMF-ın prezidenti Umud Mirzəyev giriş nitqi ilə çıxış edib.

 

Müəllif, Media və İnformasiya savadlılığı Mərkəzinin rəhbəri, AzTV Teleradio Akademiyasının prorektoru Almaz Mahmud çıxışı zamanı kitabın 7 istiqaməti əhatə etdiyini bildirib. 

 

 

“Jurnalistlərin peşəkarlığının artırılmasını nəzərdə tutan bu kitab Azərbaycan və ingilis dillərində tərtib edilib. Bu, yeni başlayan jurnalistlərdən tutmuş peşəkarlaradək hər kəsin yenilənən media şərtlərinə uyğun mariflənməsində bələdçi vəsaitdir. Bu layihə çərçivəsində yaradılan eyniadlı “Youtube” kanalında sözügedən 7 mövzuya dair hazırlanmış videotəlimlər yayımlanıb”, - deyə A. Mahmud qeyd edib. 

 

O, bildirib ki, kitabda beynəlxalq mənbələr araşdırılıb, müəllifin gəldiyi qənaət və həll yolları təqdim olunub.

 

“Eyni zamanda kitabda beynəlxalq və yerli media mütəxəssislərinin, jurnalistlərin yanaşmaları yer alıb. Onlar öz təcrübələrini bölüşməklə yanaşı, media savadlılığı çərçivəsində jurnalistlərin üzləşdiyi problemlərin həlli yollarını göstəriblər”.

 

Daha sonra yazar, jurnalist, kitabın redaktoru İlqar Rəsul, korrektor Ləman Nur, BDU-nun jurnalistika fakültəsinin Beynəlxalq Jurnalistika və İnformasiya Siyasəti kafedrasının müdiri Aynur Nəsirova, BDU-nun Yeni media və kommunikasiya kafedrasının müdiri Xatirə Hüseynova, DSMF-nin mətbuat katibi Rəşad Mehdili, Region Plus jurnalının baş redaktoru Namiq Mayılov çıxış ediblər. 

 

Tədbirdə yekun nitqi zamanı Beynəlxalq Avrasiya Mətbuat Fondunun prezidenti Umud Mirzəyev bildirib ki, ölkə olaraq media sahəsində dezinformasiyanın aradan qaldırılması üçün ötən 30 il ərzində çox böyük əziyyət görülüb.

 

 

“1992-ci ildə BAMF yarananda biz belə hallarla qarşılaşırdıq. Qarabağda ermənilər bir kəndi yandırmışdılar. Həmin axşam mətbuat kəndin "vəhşi azərbaycanlılar" tərəfindən yandırıldığı barədə dezinformasiya yaymışdı. O zaman bütün informasiyalar Kremlin filtrindən keçirdi. 1989-cu ilin noyabrında sonuncu azərbaycanlını Ermənistandan deportasiya etdilər, ancaq post-sovet məkanında bu haqda heç nə yazılmadı və bu səbəbdən indi də bunun əziyyətini çəkirik.

 

Düzgün informasiyanın zamanında yayılması obyektivliyi təmin edən əsas məsələdir. İndiki zamanda efirlərimizdə reket jurnalistikası formalaşıb və onlar çox güclüdürlər. Bu jurnalistlərin böyük bir hissəsi Azərbaycanın vicdanlı insanlarına ləkə yaxmaqla məşğuldur.

 

1992-ci ildə “Ədəbiyyat və İncəsənət” qəzetinində şöbə müdiri olaraq çalışırdım. BAMF münaqişə zonalarına jurnalistlərin səfərlərini təşkil edərək həmin yerdən obyektiv informasiyanın çatdırılması missiyası ilə yarandı. Biz 22 xarici jurnalistlə birgə xeyli işlər görmüşük. BAMF-ın vasitəçiliyi ilə “Sərhədsiz reportyorlar” və bir sıra təşkilatların kitablarının dərc edilib. Bu kitabın da cildlərini dərc etdirməkdə dəstək verməyə hazırıq",-deyə Umud Mirzəyev bildirib.  

 

Tədbirin sonunda kitabın imzalanma mərasimi keçirilib və iştirakçılara təqdimat kitabı hədiyyə edilib.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary