Son zamanlar ölkəyə idxal olunan siqaretlərin qiymətində artım müşahidə olunur. Hətta artımla əlaqədar bəzi siqaretlərin idxalında məhdudlaşmalar tətbiq olunub. Bəziləri isə bir müddətlik piştaxtalardan yığıştırılsa da daha sonra əvvəlki qiymətlə müqayisədə 20-30 qəpik bahasına satılır.  Satış məntəqələrindən isə qiymət artımına səbəb kimi firmaların siqaretləri baha gətirməsi göstərilir.

Məsələ ilə bağlı Ednews-a danışan  İqtisadi Təşəbbüslərə Yardım Mərkəzinin sədri Azər Mehtiyev  siqaret məhsullarının qiymətindəki bahalaşmanı tütün sahəsində daxili istehsalın zəif olması ilə əlaqələndirib.

“İlkin olaraq qeyd edim ki, Azərbaycanda tütün sahəsində istehsal azdır. Siqaret istehsalı ilə məşğul olan zavodların azlığı xaricdən idxala zərurət yaradır. İdxal olunan  tütün məhsullarının keyfiyyəti isə şübhə altındadır. Ümumi olaraq, bu sahədə islahatlar aparılmalıdır. Tütün sahəsinin inkişafı bahalaşmanın da qarşısını ala bilər”.

Ekspertin fikrincə, ölkədə tütün monopoliyası olduğu üçün siqaretlərdə bahalaşma müşahidə olunur:

"Bəzi məmurlar ölkədə siqaret monopoliyası qurublar. Bu monopoliyaya nəzarət isə demək olar ki, zəifdir. Həmin məmurlar fürsətdən istifadə edərək siqaretləri məqsədyönlü şəkildə satışdan çıxarırlar. Bu da qiymətlərin bahalaşmasına səbəb olur. Çox zamansa öz ciblərini düşünərək heç bir əsas olmadan qiymətləri artıraraq xalqın istəklərini görməzdən gəlirlər.

Xanlar Əlibəy

• Tag:
• siqaret
• bahalaşma
• ekspert
• Xanlar Əlibəy