Xəzər rayonunun Şüvəlan qəsəbəsində 4 nömrəli respublika xüsusi internat məktəbinin tədris işləri üzrə direktor müavini Yeganə Məmmədəliyeva sağlamlıq imkanları məhdud uşaqlar üçün xüsusi dərslik hazırlayıb. Bu barədə Təhsil Nazirliyi məlumat yayıb.
Ednews xəbər verir ki, sözügedən dərslik bu ilin sentyabrında ikinci sinif şagirdləri üçün işıq üzü görəcək.
"Eyni zamanda ikinci siniflər üçün iş dəftərləri də hazırlamışıq. Artıq üçüncü siniflər üçün də materiallar toplanır. Bu dərsliklər təkcə uşaqlar üçün deyil, həmçinin valideynlər üçün də asan olacaq"- deyə müavin bildirib.
Uşaqların Müdafiəsi İdarəsinin rəisi Həbib Kərimov söyləyir ki, dərsliklər hazırlanmazdan öncə işçi qrupu Rusiya,Türkiyə və digər Avropa ölkələrinin təcrübəsi nəzərə alınıb.
Qeyd edək ki, 4 nömrəli respublika xüsusi internat məktəbi 1961-ci ildən fəaliyyət göstərir. Həmçinin, 106 uşaq üçün nəzərdə tutulan məktəb 2015- ci ildə sökülərək yenidən bərpa edilib.