Bu gün Xalq artisti Nəzakət Teymurovanın doğum günüdür. 50 yaşını qeyd edən sənətkar deyir ki, ilk təbrikini hər zaman olduğu kimi ailəsindən alıb.

“İlk olaraq qızım Nigar mənə zəng vurdu.  Əsas olan can sağlığı, sevdiklərimizin əhatsində olmaqdır. Özümü xoşbəxt hiss edirəm. Çünki hər zaman ölkəmizdə və xaricdə yüksək səviyyədə ifalarımızı tanıtmışam. Xoşbəxt adamam ki, bildiklərimi tələbələrimə də aşılaya bilirəm”. 

Qəlbən zəngin insan olduğunu deyən Xalq artisti dünyada olan bütün hər şeyə gözəlliklə baxdığını deyir.

“Mənim üçün hədiyyənin böyük kiçik olması yox, göstərilən diqqət, verilən sevgi önəmlidir. Ona görə insanların mənə dəyər verməsi, fikirləşməsi, yada salıb təbrik etməsi mənim üçün yetərlidir. Ad günü keçici bir  gündür, ən dəyərli hədiyyəm isə səhnədəki uğurlarımdır, çünki onlar mənimçün əvəzedilməzdir. Şükürlər olsun ki, hər səhər günəşin doğuşunu görürük, canımız sağdır. Allah bunları pulsuz bizə hədiyyə edib, əsas olan qədrini bilək”. 

Nəzakət Məmmədova payız aylarında solo konserti ilə tamaşaçılarının görüşünə gəlmək fikrindədir. O, bununla bağlı qeyd edib ki, qismət olsa oktyabr, noyabr aylarında solo konsert planlaşdırır. 

Biz də dəyərli Xalq artistimizi təbrik edib, ona sənətin daha da uca zirvələrini fəth etməyi arzulayırıq.

Ləman Abbaslı