Bu gün dünya müsəlmanları müqəddəs Qurban bayramını qeyd edir.
Bu bayramda imkanı olan müsəlmanlar qurbanlıq kəsərək onun bir hissəsini kasıblara paylayır.
Eyni zamanda qurban ətinin kəsimi, paylanması, hazırlaması və istehlakı zamanı əməl edilməli olan qaydalar var.
Bununla bağlı Ednews-a açıqlamasında qida texnoloqu Ağa Salamov bildirib ki, Qurban bayramında kəsilən ət xəstə və ya çox da körpə heyvan olmamalıdır.
“Heyvan sanitar qaydalara uyğun kəsilməlidir. Bəzən yan-yana kəsilən beş-altı qoyunun qanı bir-birinə qarışdığını görürük, buna qəti yol vermək olmaz. Qurban ətləri su ilə təmin olunmuş yerlərdə, yuyulma şəraitinə uyğun kafel, metlax olan yerdə səliqəli bir şəkildə kəsilməli, dərisi soyulub doğranmalıdır. Doğrandıqdan sonra paylayarkən onu çox vaxt sellofanlara bükürlər, bu doğru deyil. Çünki bu zaman ət boğulur. Ət sellofana bükülərsə, maksimum 1 saat ərzində istifadə olunmalıdır”.
A. Salamov bildirib ki, iribuynuzlu heyvanlar kəsimdən sonra 24-48 saat arasında +4 soyuducu temperaturunda dinləndirilməlidir.
“Xırdabuynuzlular, yəni quzu, qoyun ən azı 12-24 saata qədər soyuducuda saxlandıqdan sonra istehlak olunmalıdır. Qurban əti kəsiləndən sonra Rigor mortis (ölüm sərtliyi) halına düşür. Həmin ət ölüm sərtliyi keçmədən, yəni kəsilən kimi yeyildiyi zaman insanda stress, həzmsizlik, ətin sərt olması halları baş verir. Ona görə kəsimdən sonra ət ən azı 12-24 saata qədər soyuducuda dinləndirdikdən sonra onu artıq kabab və ya digər formada bişirib yemək olar”.
Ekspertin sözlərinə görə, heyvan mənşəli qidalar, zülal mənbəyi olaraq, sağlamlığımız və metabolizmamız üçün çox önəmlidir.
“Başda “B12” olmaqla “B kompleks” vitaminləri, dəmir, sink, seleniumu da qırmızı ət məhsullarından alırıq. Gündəlik zülal ehtiyacı hər kiloqrama 1 qramdır. Nəzərə alsaq ki, gündəlik zülala olan tələbatımızın içində digər zülallı qidalar, yumurta, ağartı məhsulları və.s qidalarda var, o zaman zülal hesabından çıxmaq lazımdır. Məsələn 100 qram qırmızı ətdə 28 qr zülal var”.
Qeyd edək ki, Azərbaycan Respublikasının Qida Təhlükəsizliyi Agentliyi (AQTA) qurbanlıq heyvan kəsimi və satışının müvafiq norma və qaydalara uyğun, təhlükəsiz, sağlam şəraitdə həyata keçirilməsi məqsədilə ölkə üzrə 134 ünvanda qurbanlıq heyvanların satışı və kəsimi xidmətləri təşkil ediləcəyi bildirilib. Onlardan 61-də qurbanlıq heyvanların həm kəsimi, həm də satışı, 54-də yalnız satışı, 19-da isə yalnız kəsimi xidmətləri vətəndaşlara təklif olunacaq.
Həmin ticarət şəbəkələrinin ünvanları və əlavə məlumatları //afsa.gov.az/uploads/satish_2022.pdf linkə daxil olmaqla əldə etmək olar.
Vətəndaşlar bayram günlərində saat 08:00-dan 20:00-dək qurbanlıq heyvanları satmaq, almaq və ya kəsdirmək üçün yuxarıda göstərilən xidmətlərdən yararlana bilərlər.
Qurbanlıq heyvanı neçəyə əldə edə bilərik?
Hazırda bazarda diri çəkidə qoyunun 1 kiloqramının qiyməti 6.90-7.50 manat arasında dəyişir. Təqribən 30 kiloqram gələn qoyunun minimum 15 kilo təmiz ətinin olduğu bildirilir. Belə olan halda, 30 kiloqramlıq bir qoyunun qiyməti təqribən 207-225 manatdır. Lakin xalis ət almaq istəyənlər isə bunun üçün hər kiloqrama görə 14-15 manat ödəməlidir.
Gülnar Səlimova