“Düşünürəm ki, bu məqsədyönlü şəkildə həyata keçirilən təxribat xarakterli əməldir. Bu kimi davranışların İslam dinində heç bir əlaqəsi ola bilməz. Onlar marjinal qruplardır. Onlar qrup halında müxtəlif ölkələrdə yaşayırlar. Özlərini müsəlman kimi təqdim etsələr də onlar xarici dövətlərin xüsusi xidmət orqanlarına fəaliyyət göstərən dəstədir”.
Bu fikirləri Hacı Şahin Həsənli Azərbaycanın Londondakı səfirliyinə hücumla bağlı Ednews-a danışarkən bildirib. Din xadimi belə radikal qrupların Azərbaycana qarşı məkrli niyyətlərindən də danışıb.
Niyə məhz Azərbaycan bayrağı?
“Onlar Azərbaycanda fəaliyyətlərini genişləndirmək imkanından məhrumdurlar. Bildiyimiz kimi ölkəmizdə radikallığın sosial bazası yoxdur. Bu səbəbdən də onlar qisasını bu şəkildə alırlar. Hesab edirəm ki, bütün cəhdlər uğursuz və mənasızdır. Ölkəmizdə bu hərəkət qətiyyətlə pislənilir, dini dəyərlərlə milli dəyərləri üz-üzə qoymaq ancaq məkrli niyyətlərə xidmət edən əməldir. Bu niyyətin puça çıxacağından əminəm”.
Hacı Şahinin vurğuladığı kimi ölkəmizdə radikallığın sosial bazası yoxdur və onlar məkrli niyyətlərini həyata keçirmək üçün başqa ucuz variantlara əl atırlar.
Bəs onların başlıca məqsədi nədir? Nəyi nümayiş etdirmək istəyirlər? Din xadiminin fikrincə, burada əsas məqsəd mənsəblərarası qarşıdurma yaratmaqdır.
“Azərbaycandakı dini mühitə zərbə vurmaq, Məhərrəmlik ayında müəyyən gərginlik yaratmaqdır. Zaman keçdikcə məlum olacaq ki, bu kimlərin hansı maraqlarına xidmət edir”.
Qeyd edək ki, Azərbaycanın Böyük Britaniya və Şimali İrlandiya Birləşmiş Krallığındakı səfirliyi bir qrup radikal dini dəstənin hücumuna məruz qalıb. Səfirliyin binasına daxil olaran vandalizm aktı törədən qrup üzvləri binanın eyvanında dini bayraqlar qaldıraraq, radikal dini şüarlar səsləndiriblər.
Ləman Abbaslı
