Əməkdar jurnalist Azər Həsrət media qurumlarından birinə müsahibəsi zamanı namazın Azərbaycan dilində qılınmalı olduğunu deyib. Onun bu sözləri sosial şəbəkələrdə maraqla qarşılanmaqla yanaşı, qınaq obyektinə də çevrilib.
İzləyicilərin əksəriyyəti Azər Həsrəti sionist adlandırıb. Əməkdar jurnalist yazılan şərhlərə cavab olaraq şəxsi facebook səhifəsində paylaşım edib.
“Sadəcə bir söz dedik. Dedik ki, namaz öz dilimizdə qılınarsa yaxşıdır. Dərhal da sionist elan edildik. Elan edənlər də fars-molla rejiminin uzantıları oldu. Biz illərdir deyirik ki, bir tərəfdə şiəlik fars milliyyətçiliyi üçün, digər tərəfdə də sünnilik ərəb milliyyətçiliyi üçün istifadə edilir. Ona görə də müsəlmanlara çağırış edirik ki, istər sünni, istər şiə olun, amma kor-koranə farsın və ərəbin ardınca getməyin. Amma kimə deyirsən? Bizim İslamla, onun məzhəbləri ilə heç bir işimiz yoxdur. Bizim davamız bu məzhəblərin arxasına gizlənib ərəb və fars milliyyətçiliyi edənlərlədir. Bu fərqi anlayın. Namazın məhz ərəbcə qılınmasına gəlincə, Quranda belə bir tələb yoxdur. Varsa, bilənlər bizi də bilgiləndirsin lütfən...”
