Özünü 12-ci İmam Mehdi kimi təqdim edib 40 nəfərə qarşı dələduzluq etməkdə ittiham olunan Aqil Babayevin cinayət işi üzrə məhkəmə araşdırması davam etdirilib.

Ednews xəbər verir ki, bu gün Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən prosesdə zərərçəkmiş qismində tanınmış Anar Aslanov dindirilib.

Bakı Dövlət Universitetinin Hüquq və Beynəlxalq münasibətlər fakültəsini bitirmiş zərərçəkmişin dediyinə görə, Aqil Babayevi 2004-cü ildən tanıyıb. Həmin vaxt bir neçə dəfə onun Əhmədli qəsəbəsində yerləşən evində keçirilən dini məclislərdə iştirak edib: "Dini yaxşı bilir, hər dəfə görüşəndə İslam dininin şərtlərindən danışırdı. Deyirdi dinin əsas şərtlərindən biri zəkat verməkdir. 2006-cı ildə evində keçirdiyi məclislərin birində ona Allah təala tərəfindən şəhadət verildiyini elan etdi".

Zərərçəkmiş ifadəsində deyib ki, təqsirləndirilən şəxsə 585 min 300 manat verib.

Aqil Babayevin isə ittihamı qəbul etməyib.

Məlum olub ki, Aqil Babayev ibtidai istintaqa ifadəsində Anar Aslanov da daxil olmaqla, bir neçə nəfərin onu döydüyünü, evində axtarış aparıb külli miqdarda pulunu və xeyli qızılını apardığını deyib.

Proses avqustun 30-da davam etdiriləcək.

Xatırladaq ki, Aqil Babayev Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsi tərəfindən həbs edilib.

Onun barəsində Cinayət Məcəlləsinin 178.4-cü (dələduzluq, külli miqdarda ziyan vurmaqla törədildikdə) maddəsi ilə ittiham elan edilib.

Aqil Babayev “ŞaurmaN1” restoranlar şəbəkəsinin şəriki olub.