Xəbər verdiyimiz kimi Azərbaycan Səhiyyə Naziri Teymur Musayev açıqlamasında bildirmişdi ki, “Azərbaycanda koronavirusa yoluxma halları hələ də var. Lakin ölüm halları minimal səviyyədədir. Buna görə pandemiyanın sonuna doğru getdiyimizi bəyan edə bilərəm”.

Pandemiyanın bitməsi ilə bağlı quru sərhədlərin açılıb-açılmaması məsələsi də cəmiyyətdə sual yaradır. Maraqlıdır ki, pandemiyanın bitməsi quru sərhədlərin açılmasına şərait yarada bilərmi?

Bununla bağlı iqtisadçı-ekspert Natiq Cəfərli Ednews-a açıqlamasında qeyd etdi ki, quru sərhədlərin bağlı olması  pandemiya ilə əlaqələndirilsə də əslində təhlükəsizlik məsələləri ilə bağlıdır.

“Ümid edirəm ki, yeni ilə qədər quru sərhədlər açıq olar. Quru sərhədlərin bağlı olması ciddi problemlər yaradır. Amma bilirik ki, qonşu dövlətlərdə baş verən  proseslərə görə təhlükəsizliklə bağlı problemlər yaşana bilər. Quru sərhədlərin bağlı saxlanılması bununla əlaqəlidir. İranda, Rusiyada baş verən hadisələrə nəzər yetirəndə görürük ki, sanki belə bir vəziyyətin yaranması ehtimalını nəzərə alaraq quru sərhədləri bağlı saxlayıblar”.

Ayan Rzayeva