İcbari Tibbi Sığorta üzrə Dövlət Agentliyində Vətən müharibəsində, eləcə də erməni təxribatlarının qarşısını alarkən yaralanan qazilərə yardım edilməsi ilə bağlı koordinasiya mərkəzi yaradılıb.
Ednews trend.az-a istinadən xəbər verir ki, bunu İcbari Tibbi Sığorta üzrə Dövlət Agentliyinin Tibbi planlama departament rəhbəri Hikmət İbrahimli deyib.
O bildirib ki, rayon mərkəzi xəstəxanalarında o bölgədəki qazilərin sayına görə koordinatorlar işə götürülüb:
"Qazilər növbədənkənar qəbul edilir, onlara xidmət göstərilir. Onlar əgər müayinə və müalicənin özəl xəstəxanalarda aparılmasını istəyirsə, onlara göndəriş verilir. Həmçinin, müalicəsi rayonda mümkün olmadıqda, həmin şəxslər Bakıya yönləndirilir".
H.İbrahimli qeyd edib ki, müharibə iştirakçılarına yardım göstərilməsi üçün ayrıca psixoloq ştatı yaradılıb və onlara psixoloji xidmət göstərilir.