Bakı şəhəri üzrə məişət zorakılığı ilə bağlı halların 40 faizi Sabunçu rayonunda qeydə alınıb. 

Bu fikirləri Sabunçu rayon icra  başçısının müavini Rəna Fərəcova jurnalistlərə açıqlaması zamanı deyib.

Verilən məlumata görə,  2021-ci ildə Sabunçu rayonunda zorakalıqla bağlı 67 müraciət daxil olubsa da,  bu ilin 10 ayında bu rəqəm 83-ə yüksəlib. 

Nə üçün məhz bu rayon zorakılıq üzrə ilk pillələrdə yer alır. 

Məsələni Azərbaycan Uşaqları Birliyinin sədri Kəmalə Ağazadə ilə müzakirə etməyə çalışdıq. O,  Ednews-a açıqlaması zamanı bildirib ki, bu hal, İcra Hakimiyyətləri yanındakı komissiyaların fəallığından irəli gələn bir məsələdir.

“İnsanlar artıq bilirlər ki, çətin anlarında, problemləri olanda rahatlıqla aidiyyatı qurumlara müraciət edə bilərlər. Bu fəallığı mən də müşahidə etmişəm. Hər şey istək, entuziayazmdan irəli gəlir ki, müraciətlər artır”. 

Kəmalə Ağazadə ölkə üzrə aparılan hesablamalardakı faiz nisbətindən danışarkən, vurğulayıb ki, bütün ölkə üzrə faizlər fərqli ola bilər. Ancaq bu məsələnin araşdırılmasına böyük zərurət və ehtiyac var. 

“Hər kəndin özünün xüsusi spesifikliyi var. Ola bilsin birində məişət zorakılığı deyil, başqa səbəbdir. Ona görə də öncədən  xəritələşmə həyata keçirilməlidir. Nəticə açıqlandıqda isə, göstərici olaraq hansı regionda hansı sahədə işə üstünlük verilməsi və nə mövzu üzrə güclü maarifləndirmə işləri aparmaq bizə məlum olacaq. Mental olaraq, biz hansı bölgəyə necə həssas yanaşmağı formalaşdırmalıyıq”.

Rəna Mürşüd