Bakı taksilərinin sayına görə İstanbulu ötüb. Bildirilib ki, hazırda Bakıda 28 min taksi fəaliyyət göstərir. İstanbulda isə bu 17 min civarındadır.

Bakı və İstanbul arasında taksi sürücülərinin sayında fərq təəccüblü və qeyri-real görünür.

Məsələni aydınlaşdırmaq üçün Ednews nəqliyyat ekspertləri Aslan Əsədov və Elməddin Muradlı ilə əlaqə saxlayıb.

Aslan Əsədov açıqlamasında qeyd edib ki, rəqəmin kim tərəfindən yayılması və hansı mənbəyə əsaslanması ilə bağlı heç bir dəqiq fakt yoxdur.

Onun sözlərinə görə, rəqəmin hesablanmasında qeyri-dəqiqlik var.

“Bakı və İstanbul arasında taksilərin sayına görə müqayisə aparmaq düzgün addım deyil. Qeyd edim ki, İstanbulda taksilərin və taksi sürücülərinin qeydiyyatının keçirilməsi ilə məşğul olan dövlət orqanı var. Bu dövlət orqanında bütün nəqliyyat vasitələrinin siyahısı tərtib edilib. Təəssüf ki, Bakı şəhərində belə bir dövlət xidməti yoxdur. Əlbəttə, bir müddət öncə bununla bağlı kiçik agentlik fəaliyyət göstərirdi, lakin onun təqdim etdiyi rəqəmlər cüzi miqdarda idi və reallığı əks etdirmirdi. Ola bilər ki, Bolt, UBER və digər taksi şirkətləri öz siyahısında və hesabatlarında hər hansı qeydiyyat rəqəmi təqdim etsinlər. Amma onların rəqəmi də Bakının İstanbulla müqayisədə taksi çoxluğunu təsdiqləyə bilməz”.

Elməddin Muradlının sözlərinə gəlincə isə, o, Bakıda 60 mindən çox taksinin fəaliyyət göstərdiyini bildirib.

“Bakı-Sumqayıt regionunda qanuni və qanunsuz şəkildə 60-80 min civarında taksi fəaliyyət göstərir. Bu taksilərin böyük əksəriyyəti gündəlik yol hərəkətində sıxlığın və tıxacın yaranmasına səbəb olurlar. Məsələn, Qara Qarayev, Ziya Bünyadov, Moskva prospektlərində və Bakı-Sumqayıt yolunda taksi sürücüləri xeyli nəqliyyat problemləri və pozuntuları yaradırlar. Onu da qeyd edim ki, Bakıda və Sumqayıtda qanunsuz taksilərin işləməsinə imkan yaradan ictimai nəqliyyatın bərbad vəziyyətdə olmasıdır. Əgər ictimai nəqliyyat normal vəziyyətdə olsa idi, vətəndaşlar manatlıq taksilərə yox, sırf avtobuslardan istifadə edilməsinə üstünlük verərdilər. Sadəcə aidiyyatı qurumlar ictimai nəqliyyatı qaydaya salmadığı səbəbindən insanlar mütəmadi olaraq taksilərə minmək məcburiyyətində qalır”.

Yunis Abdullayev