Hazırda Amerika Birləşmiş Ştatlarında səfərdə olan Beynəlxalq Avrasiya Mətbuat Fondunun prezidenti Umud Mirzəyev dekabrın 2-3- tarixində Napa Vadisində "Sülh üçün Çağırış Festival"ında iştirak edib.
Ednews xəbər verir ki, o, festivalda çıxış edərək Azərbaycanın ən böyük problemi olan minadan çirklənən əraziləri barədə fikirlərini geniş auditoriyaya çatdırıb.
“Zənglər festivalı” adlanan bu gözəl mərasimdə bir azərbaycanlı kimi çıxış etmək mənim üçün xüsusi şərəfdir. Ev sahiblərinə - əziz dostum Heidi Kühnə və cənab Miljenkoya səmimi qonaqpərvərliyə, tədbirin gözəl təşkilinə görə səmimi qəlbdən təşəkkür etmək istəyirəm.
Mən, Azərbaycanın Qarabağ bölgəsinin Füzuli rayonunun Aşağı Əbdürrəhmanlı - 30 ildir mənim və həmkəndlilərimin üzünə yolları bağlı olan kəndindənəm. Qarabağın bütün kəndləri kimi mənim də məmləkətim mövcud deyil. Bir milyondan çox məcburi köçkün öz doğma yurdlarından uzaqda yaşayır. Hazırda işğaldan azad olan Azərbaycanın Qarabağ torpaqlarının 11 min kvadrat kilometr ərazisi mina və partlamamış hərbi sursatlarla çirklənib. Həmin ərazilərdə bir milyondan çox müxtəlif tipli mina basdırılıb. 2020-ci ilin Noyabr sülh sazişindən bu yana həmin ərazilərdə mina partlayışları nəticəsində 268 nəfər ölüb və ya yaralanıb”.
U.Mirzəyev qeyd edib ki, xanım Heidi bu ilin mart ayında Qarabağın Ağdam və Tərtər rayonlarına səfərimiz zamanı ərazilərin minalarla necə çirkləndiyini öz gözləri ilə görüb.
“Hazırda Qarabağ torpaqlarında qaçqın və məcburi köçkünlərin öz doğma yurdlarına qayıtması üçün Azərbaycan hökuməti tərəfindən çoxsaylı infrastruktur layihələri həyata keçirilir. Azərbaycan Respublikasının Minatəmizləmə Agentliyi (ANAMA) da insanların təhlükəsizliyinin təmin edilməsi istiqamətində böyük işlər görür”.
O, çıxışı zamanı onu da əlavə edib ki, təmsil etdiyim BAMF-ın İcma Mina Aksiya Komandası Qarabağ bölgəsində on min hektardan (10.000) çox ərazini təmizləyib.
“Amma bizim səylərimiz mina çirklənməsinin miqyası ilə müqayisədə çox kiçikdir. Minalar ölkələri ən çox narahat edən və bəşəriyyətə ziyan vuran problemlərdən biridir. Sizi sülh quruculuğunun inkişafı üçün yeni yollar, üsullar tapmağa, dünyada, eləcə də daha çox mina, digər partlayıcılarla çirklənmiş Qarabağdakı mina problemini aradan qaldırmağa çağırıram. Vətəndaş cəmiyyətinin lazımi resurslara çıxışı beynəlxalq səviyyədə razılaşdırılmış inkişaf məqsədlərinə nail olmaq və minasız dünya yaratmaq üçün açardır. Bu uzun yola ilk addımı Qarabağın kiçik Aşağı Əbdürrəhmanlı kəndindən - mənim kəndimdən başlayaq”.
Sonda BAMF-ın prezidenti tədbirin bütün iştirakçılarına təşəkkürünü bildirib:
“Bu böyük tədbirin bütün iştirakçılarının - hökumət rəsmilərinin, işgüzar dairələrin və vətəndaş cəmiyyətinin nümayəndələrinin dostluğuna və həmrəyliyinə inanaraq, Qarabağ və Cənubi Qafqazda sülh və inkişafa dəstəyimizin şərəfinə qlobal tost üçün mənə və "Sülhün Kökləri"-nə qoşulmağınızı xahiş edirəm”.
Qeyd edək ki, tədbirin əsas media dəstəkçisi ABŞ-ın nüfuzlu ABC7 kanalı olmuşdur.
Oğuz Ayvaz
