Son zamanlar bəzi qazilərimiz tərəfindən ictimai yerlərdə hərbi formadan sui-istifadə etmələri barədə xəbərlər yayılmaqdadır.
Bir müddət əvvəl hərbi geyimdə 20 yanvar metrostansiyasının qarşısında dilənən qazinin yayılan görüntüləri cəmiyyət arasında heç də birmənalı qarşılanmayıb. Bu kimi hallar bir çoxları tərəfindən narazılıqla və tənqidlə qarşılanıb.
Ümumiyyətlə, hərbi formanı gündəlik geyinmək və daima bundan istifadə etmək nə dərəcədə doğrudur?
Ednews-un sualına cavab verən hərbi ekspert Emin Həsənli bildirib ki, bu kimi hərəkətlər qanuni və mənəvi cəhətdən heç bir halda doğru deyil.
“Qazilər cəmiyyət arasında xüsusi hörmətə layiq olan insanlardır. Hər kəsin onlara böyük ehtiramla yanaşırlar. Çünki onlar vətən uğrunda ölümü gözə alaraq vuruşublar. Bəzi qazilərimizin səhvlərinə görə bütün qazilərimizi günahlandırmaq düzgün deyil. Tək-tük hallarda bəzi şəxslər hərbi formadan sui-istifadə edir. Zaman ərzində bu problemlər öz həllini tapacaq. Sizə deyim ki, hərbi formanı geyinib özünü görsərtmək halları ABŞ, Rusiya və post-sovet ölkələri, eləcə də digər ölkələrdə də yaşanır. Amma qazilərimiz də gərək hərbi geyimin nizam qaydalarına əməl etməlidirlər. Hərbi formaları gündəlik olaraq yalnız hərbiçilər geyinir. Vətən müharibəsində iştirak edən qazilərimizin adi günlərdə hərbi formadan gəzinti üçün istifadə etəməsi yalnış addımdır. Əgər geyinmək istəyirlərsə, mütləq hərbi geyim qaydalarına əməl etməlidirlər. Üzü tüklü olmamalıdır, hərbi formanı müxtəlif ayaqqablar ilə, normal olmayan və səliqəsiz şəkildə geyinməməlidirlər. Hərbi formanı geyinib öz şəxsi maraqlarını güdmək qanuni və mənəvi cəhətdən yolverilməzdir. Qanuni qaydada cəza tətbiq olunmaldır. Bu istiqamətdə dövlətimiz müxtəlif kütləvi informasiya vasitələri ilə maarifləndirmə tədbirləri aparır, o cümlədən digər ciddi tədbirlər də görülür”.
Məsələyə münasibət bildirən hüquqşünas Sahib Məmmədov Ednews-a açıqlamasında vurğulayıb ki, hərbi formadan sui-istifadə halları yalnız qanunla qarşısı alına bilər.
“Hesab edirəm ki, qanunvericilikdə məsələ ilə bağlı əlavə tənzimləyici dəyişikliklər edilməlidir. Yalnız aidiyyatı qurumlar tərəfindən tətbiq edilən xüsusi qanunlar və qaydalar müharibədə iştirak edən və sağlamlığını itirən qazilərə ictimai yerlərdə hərbi formadan necə və hansı hallarda geyinmək barədə məlumatlandıra bilər. Kimsə bu formanı geyinib istədiyi qanunsuz əməllər törədə bilməz. Buna haqq qazandırılmamalıdır. Qanunvericilikdə tənzimləyici aktlar vasitəsi ilə hərbi formanın sui-istifadəsinə və bundan başqa şəxsi məqsədlərin güdülməsinə imkan verilmir. Bu aktlar xüsusi məsuliyyətə cəlb olunma tədbirlərini də tətbiq edəcək. Qazilərimiz hərbi geyimi yalnız Anım, Zəfər və Silahlı Qüvvələr günlərində ictimai yerlərdə istifadə edə bilərlər”.
Qeyd edək ki, hərbi geyim formasının daşınması “Azərbaycan Respublikası Silahlı Qüvvələrinin hərbi qulluqçularının hərbi geyim forması və fərqləndirmə nişanları haqqında” Əsasnamə və “Azərbaycan Respublikası Silahlı Qüvvələri hərbi qulluqçularının hərbi geyim forması və fərqləndirmə nişanlarının təsvirləri”nin təsdiq edilməsi barədə” Azərbaycan Respublikası Prezidentinin 2001-ci il 25 iyun tarixli Fərmanı ilə tənzimlənir. Azərbaycan Respublikasının İnzibati Xətalar Məcəlləsinin 534-cü maddəsinə əsasən hərbi geyim formasını qanunsuz daşımağa görə şəxs inzibati xətanın obyekti olmuş hərbi geyim forması müsadirə edilməklə 300 manatdan 500 manatadək cərimə edilir.
Yunis Abdullayev