“Cadu və sehr mövcuddur və onun təsiri də var. Elm inkar etsə də müasir dövrdə müəyyən ölkələrdə bununla bağlı təcrübələr aparılır, hətta deyilənə görə bəzi ölkələrdə rəsmən istifadə də edilir. Lakin mövcud olan bir şey o demək deyil ki, ondan istifadə etmək olar. Məsələn, İslam dininə görə cadu və sehr haramdır və ondan istifadə etmək də qadağandır”.
Bu fikirləri Ednews-a ilahiyyatçı Tural İrfan söyləyib. O, qeyd edib ki, son zamanlar insanların sehrə bu qədər meyl etməsinin səbəbi sosial problemlərini həll edə bilməməsidir. Ona görə asan çıxış yolu kimi cadugarlara meyl edirlər.
“Cadudan qorunmaq üçün müxtəlif yollar var və bu İslam dinində də göstərilir. Məsələn, deyilir ki, insan nə qədər həm fiziki, həm də mənəvi cəhətdən pak olsa sehr ona az təsir edər. İbadətini tərk etməməlidir. Müxtəlif surələr var ki, onları oxumaq sehrdən qorunmaq üçün vasitə hesab edilir. Ayətül kürsi, Fələq, Nas, İxlas və Fatihə surələrini çox oxumaq sehrdən təmizlənməyə kömək olur. İnanmayan insana cadu daha az təsir edir. Cadu İslam dinində şeytan əməli sayılır, şeytan əməli ilə də ancaq pis əməllər etmək olar ki, bu da qadağandır. Ancaq əgər caduya inanırıqsa, yaxud insanların çoxu inanırsa demək onun batil edilməsinə də inanmaq lazımdır. Yəni, sehr psixoloji, şər qüvvələr, mənfi enerjilərin idarə edilməsi nəticəsində təsir göstərə bilir. Onu da şübhəsiz ki, pozub ləğv etməsən, edilən insana əsasən ruhi, psixoloji mənfi təsir göstərir. Lakin elm bunu hələ sübut edə bilmir. Fəqət elmin sübut etmədiyi hər şeyi də inkar etmək doğru deyil. Ən yaxşısı insanlar fiziki, mənəvi cəhətdən təmiz olsunlar, pislik etməsinlər, neqativ insanlardan uzaq olsunlar, Allahla daima dua vasitəsi ilə əlaqədə olsunlar, o zaman onlara heç bir sehr, cadu təsir etməz, inşallah”.
Oğuz Ayvaz