Xəbər verdiyimiz kimi, Azərbaycan Ordusu Ulu Öndər Heydər Əliyevin rəhbərliyi altında 1994-cü il yanvarın 5-dən 6-na keçən gecə keçirdiyi uğurlu əməliyyatla Horadiz qəsəbəsi də daxil olmaqla, Füzuli rayonunun 22 yaşayış məntəqəsini erməni işğalçılarından azad etməsindən 29 il ötür.
Ednews xəbər verir ki, bu gün münasibəti ilə “Horadiz əməliyyatı” iştirakçıları, qazilər, hərbçilər, media nümayəndələri, Beynəlxalq Avrasiya Mətbuat Fondunun prezidenti Umud Mirzəyev Şəhidlər Xiyabanını ziyarət ediblər.
Mərasim iştirakçıları Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının, eləcə də Horadiz şəhidlərini xatirəsini yad ediblər.
İştirakçılar Birinci Qarabağ müharibəsi tarixində Horadiz əməliyyatının xüsusi yeri olduğunu, Horadiz əməliyyatının hərb tariximizin ən parlaq səhifələrindən birini təşkil etdiyini qeyd ediblər.
“Horadiz əməliyyatı”nın döyüşçüsü, tabor komandiri Zahir Həsənov da iştirakçılar arasında olub. O, bu günlə bağlı ürək sözlərini saytımıza bölüşüb.
“Həmin əməliyyatın ən böyük kəsimi ondan ibarət idi ki, bu döyüş əməliyyatı öz qələbəsi ilə düşməni atəşkəsə qol çəkməyə məcbur etdi. Həmin gün Azərbaycan silahlı qüvvələrinin ilk qələbəsi sayılırdı. Əməliyyatda iştirak edən bütün əsgər və zabitlərimizə, o cümlədən də Ali Baş Komandana eşq olsun deyirəm. Çünki Ali Baş Komandan bu ordunu öz arxasınca apararaq ilk qələbəsini əldə edə bildi. Mən də həmin döyüşlərin ikinci tabor komandiri kimi iştirakçısı olmuşam. Döyüşlərə görə Azərbaycan bayrağı ordeni ilə təltif olunmuşam. İkinci tabor cəbhə boyu ordunu qələbəyə aparmışdı. Mən buna görə ikinci batalyonun şəxsi heyətinə öz minnatdarlığımı bildirirəm”.
Qeyd edək ki, Horadiz əməliyyatı Azərbaycan Ordusunun 1994-cü ilin qışında keçirdiyi ən uğurlu əməliyyat olub. Əməliyyatda misilsiz qəhrəmanlıq nümunələri göstərdiklərinə görə bir neçə nəfər Azərbaycanın Milli Qəhrəmanı adına layiq görülüb.
Oğuz Ayvaz
