“İrəli” İctimai Birliyinin təşkilatçılığı ilə Azərbaycan Milli İncəsənət Muzeyində Qanlı Yanvar faciəsinin 33-cü ildönümünə həsr olunmuş “Xalqımızın qürur və qəhrəmanlıq salnaməsi” adlı tədbir keçirilib.
Tədbirin giriş hissəsində Azərbaycan Respublikasının Dövlət Himni səsləndirilib, Vətənimizin azadlığı və suverenliyi uğrunda canından keçən şəhidlərimizin xatirəsi bir dəqiqəlik sükutla yad edilib.
Tədbirdə çıxış edən “İrəli” İctimai Birliyinin sədri Şahin Rəhmanlı qeyd edib ki, 20 Yanvar faciəsi xalqımızın qəhrəmanlıq salnaməsi kimi tarixə yazılıb. Qanlı Yanvar faciəsinə dövlət səviyyəsində tam siyasi-hüquqi qiymət verilməsi məsələsinin ümummilli lider Heydər Əliyevin sayəsində həllini tapdığı tədbir iştirakçılarının diqqətinə çatdırılıb. Ümummilli məsələlərdə gənclərin aktivliyinin olduqca mühüm amil olduğunu qeyd edən Şahin Rəhmanlı gəncləri bu kimi proseslərdə yaxından iştirak etməyə çağırıb: “Ardıcıl olaraq istər Qanlı Yanvar, istərsə də, digər əlamətdar günlərdə “İrəli” İctimai Birliyi tərəfindən sosial media kampaniyaları təşkil olunur. Bu tədbirlərin əsas məqsədi ölkə həqiqətlərin beynəlxalq miqyasda sosial şəbəkə istifadəçilərinə çatdırılmasıdır”.
Daha sonra çıxışçılar – Azərbaycan Respublikasının Xalq artisti, görkəmli teatr və kino aktyoru Nurəddin Mehdixanlı və Əməkdar jurnalist, 20 yanvar şəhidlərinə həsr edilmiş “Şəhidlər” kitabının müəllifi Rafiq Səməndər 33 il öncə xalqımızın keçdiyi mübarizə yolundan söz açaraq, həmin dövrün dövlət müstəqilliyinə gedən yolun başlanğıcı olduğunu qeyd ediblər.
Bildirilib ki, bu qanlı hadisələrindən cəmi 30 il sonra – 2020-ci ildə Vətən müharibəsində Müzəffər Ali Baş Komandan İlham Əliyevin rəhbərliyi ilə qazanılmış şanlı qələbə 20 Yanvar faciəsinin açdığı yaraya da məlhəm oldu. Ümummilli mənafelərin müdafiəsi naminə canlarından keçmiş və şəhidlik zirvəsinə ucalmış Vətən övladları misilsiz fədakarlıqları ilə xalqımızın qəhrəmanlıq salnaməsinə yeni parlaq səhifə yazdılar. 20 Yanvar xalqımız üçün təkcə hüzn günü kimi deyil, həm də milli qürur, milli iradəmizin zəfər çaldığı gün kimi tarixə düşdü. Həmçinin diqqətə çatdırılıb ki, gənclərimiz bu hadisələri heç zaman unutmamalı və xalqımızın qəhrəmanlıq salnaməsini gələcək nəsillərə ötürməlidir.
Tədbir gənclərin suallarının cavablandırılması ilə davam edib.
Qeyd olunub ki, Birlik tərəfindən 20 Yanvar faciəsinin 33-cü ildönümünə həsr olunmuş sosial media kampaniyasının keçirilməsi nəzərdə tutulur. Ümumilikdə tədbirlər planının əsas məqsədi Azərbaycan xalqının mübarizə dolu, tarixi səhifəsinin gənclərə aşılanması, habelə 33 il öncə baş vermiş faciə barədə gənc nəslin məlumatlılığının artırılmasıdır.