Hazırda ciddi problemlərdən biri də məktəblərdə psixoloq çatışmazlığının olmasıdır. Çoxsaylı şagirdləri olan məktəblərdə belə psixoloqların sayı azdı. Bu qədər şagirdə bir- iki nəfər psixoloqun olması nə dərəcədə düzgündür? Rayon məktəblərində də vəziyyət o qədər ciddidir. Hətta bəzi rayon,kənd məktəblərində psixoloqlara ehtiyac varkən nəyə görə bu məsələnin üstünə düşülmür?
Məsələ ilə bağlı Təhsil Nazirliyinin İctimaiyyətlə əlaqələr sektorunun müdiri Cəsarət Valehov Ednews-a açıqlamasında bildirib ki, Nazirlik bununla bağlı bir sıra addımlar atacaq.
“Yaxın aylarda bu barədə daha geniş şəkildə ictimaiyyətə məlumat verəcəyik”.
Sosioloq Aynur Hacıyeva Ednews-a açıqlamasında bildirib ki, məktəblərdə psixoloq çatışmazlığı ciddi problemlərdən biridir. Şagird sayı çox olan məktəblərdə demək olar ki, bir psixoloq fəaliyyət göstərir.
Onun sözlərinə görə rayon məktəblərində mənzərə heç də ürəkaçan deyil.
.jpg)
“Ən əsas məsələlərdən biri isə psixoloq mövcud olan məktəblərdə psixoloji işin yetərsizliyidir. Son dövrlərdə sosial şəbəkələrdə yayılan orta məktəb videoları sübut edir ki, şagirdlərdə psixoloji problemlər,davranış pozuntuları və s. mövcuddur. Şagirdlərin təlim- tərbiyəsində ailələrlə daimi əlaqəli işlərdə məktəb psixoloqları müəllimlərə yaxından köməkçi olmalıdır. Lakin çox saylı şagirdi olan məktəblərdə bir psixoloq bütün sinif şagirdlərinə yetə bilməz. Təbii ki, bu halda şagirdlər diddətdən kənarda qalır, xidmətdən yararlana bilmirlər. Bu hal məktəblər üçün böyük problemdir”.
O qeyd edib ki, bunun üçün yalnız məktəb psixoloqlarının işini sorğulaya bilmərik.
“ Məsələyə geniş şəkildə baxılmalı, məktəblərdə psixoloq vakant yerlərinin açılmasına dəstək olunmalı, şagirdlərlə psixoloji işin aparılmasına ciddi nəzarət olmalıdır”.
Thsil eksperti Elçin Əfəndiyev isə qeyd etdi ki, tam və orta təhsil müəssisələrində məktəblərində 1 milyon 600-dən çox şagird var. Onların təlim-tərbiyəsi ilə 160 minə yaxın müəllimin məşğul olması, onlara psixoloji cəhətdən dəstək verməsi qeyri-mümkündür.
.jpg)
"Hər bir şagirdin fərqli psixologiyası var. Ona görə düşünürəm ki , hər bir məktəbdə psixoloq mütləq olmalıdır”.
Ekspertin sözlərinə görə, ölkəmizdə psixogiya təhsili üzrə kadr hazırlığı ilə bir neçə universitet məşğul olur. Psixologiya sahəsində plan yerlərini artırmalıyıq ki, məktəbləri psixololoqlarla təmin edə bilək.
“Hazırda məktəblərdə faktiki olaraq psixologiya sahəsində çalışanlar var. Onları araşdırsaq görərik ki, bu şəxslər heç psixologiya üzrə təhsil almayıblar. 4447 məktəbi araşdırsaq görərik ki, bəzi məktəblərdə ümumiyyətlə psixoloq yoxdur. Həmin yer boşdur. Bu yerlər məktəb rəhbərliyi tərəfindən varmış kimi göstərilib amma onların əməkhaqqları həmin şəxslər tərəfindən mənimsənilib”.
O həmçinin bildirib ki, ciddi çatışmazlıqları son zamanlar məktəblərdə baş verən neqativ hadisələrdən belə qənaətə gələ bilirik.
“ Dəfələrlə təklif etmişik ki, məktəblərdə 1 saat belə olsa psixologiya dərsi tədris olunsun. Bu dərsin tədris olunması cəmiyyət tərəfindən müşahidə olunan neqativ halların qarşısını ala bilər”.
Ekspert rayonlarda psixoloq tapmaq müşkül məsələ olduğunu da vurğulayıb.
“Psixoloqun şagirdlərlə valideynlərlə işləməməsi nəticəsində erkən nikahlar olur. Rayonlarda 15-16 yaşlarda uşaqların valideynləri tərəfindən erkən nikaha cəlb olunması hallarının şahidi oluruq. Hansı ki psixoloq burada müdaxilə edə bilər”.
Ayan Rzayeva
